धनगढी,१० सामन ।

निवर्तमान वन तथा वातावरण मन्त्री नारदमुनि राना अपन निर्वाचनमे क्षेत्र विकास कार्यक्रम अन्तरर्गत संघीय सरकारसे लायभए योजनाक निरीक्षण देखरेख करिरहएँ ।
बे धनगढी उपमहानगरपालिका भितर लगभग आधो दर्जनसे जद्घि योजनाक देखरेख करिरहएँ । उनमैसे धनगढी उपमहानगरपालि १३ मे निर्माण हुइरहो रानाथारु सांस्कृतिक संग्रहालय , भगवती सामुदायीक भवन, मटियारी सामुदायिक भवन, वासुदेवी माध्यमिक विद्यालयक भवन सुकुटी खोलामे निर्माण भओ तटबन्धकी निरीक्षण औ देखरेख करिरहएँ ।
बे कहि मिर पहलमे बिनियोजन भए रकमसे कुछ योजना बनिगएहएँ और कुछ बनरहे हएँ ’, ‘काम गतिलेनसे नागरिकनके सहज भओहए ।’
बे कहि राना सांस्कृतिक संग्रहालय निर्माण होनसे कैलाली और कञ्चनपुरमे इकल्लो बैठनबारे रानाथारु समुदायक पहिचान स्थापित होबैगो बताइ । यिनहिक पहलमे नेपाल सरकारसे रानाथारु समुदायके आदिवासीमे सूचीकृत कराइरहएँ ।
अनुगमनके क्रममे स्थानीयवासी कहि संघीय सरकारसे विनियोजित बजेटसे प्रभावकारी काम भओ कहिके बताइहएँ । सुकुटी खोलामे तटबन्ध नहोनसे हिनक बर्सेनि खेती योग्य जमिन कटान होतरहए । तटबन्ध होनसे अब खेती योग्य जमिन बचजाबैगी स्थानिय व्यक्तिकी कहातहए ।
निवर्तमान मन्त्री रानाक पहलमे धनगढीमे करिब १ सय योजना हएँ । बे मैसे कुछ बडे योजना फिर हएँ । जौनसे धनगढीक अनुहार बदलनमे बहुत बडो भूमिका खेलैगो ।
रानाकी पहलमे खुटिया पुल, उर्मा, भादासे लैके गदरिया फूलबारी रिङरोड जहे भदौके महिनामे टेन्डर होवैगो बताइ करिब २५ करोड रकम विनियोजन भओहए । हुलाकी सडककी स्तरोन्नतिक ताँहि जिरो किलोमिटर क्याम्पस रोडसे मनेहरा जङ्गल तक चारलेन और मनेहरा जङ्गलसे भजनी तक दुई लेन सडक निर्माण होबैगो बताइहएँ ।
धनगढी खुटिया दिपायल फास्ट ट्याकक फिर टेन्डर हुइगौहए कहिके बताइहएँ ।