रानाथारु भाषाकी पहिलो“फगुनी’’ उपन्यास बिमोचन

रानाथारु भाषाकी पहिलो“फगुनी’’ उपन्यास बिमोचन

धनगढी, २७ कार्तिक ।
रानाथारु भाषाकी पहिलो उपन्यास “फगुनी” बिमोचन भओ हए । नेपाल रानाथारु समाजद्वारा आयोजित दिबारीक शुभकामना आदानप्रदान कार्यक्रममे जा उपन्यासको विमोचन प्रतिनिधी सभा सदस्य माननिय नारदमुनि राना करिरहएँ ।

माननिय राना कार्यक्रमके बडे पहुना रहएँ । उपन्यास विमोचन कार्यक्रममे प्रतिनिधी सभा सदस्य राना कहि “उपन्यास से राना थारु समुदायक लोक कला संस्कृति बचानके संगए पहिचान देनमे सहयोग होबैगो बताइ हए । रानाथारु भाषामे पहिले फिर पत्रपत्रिका प्रकाशन भए रहए पर उपन्यास विधामे कोइना कलम नाचलाइ रहएँ , जा “फगुनाी” उपन्यास रानाथारु भाषामे पहिली उपन्यास हए । नेपाल रानाथारु समाजसे प्रकाशित उपन्यास “फगुनाी” की लेखक नेपाल रानाथारु समाजके पुर्व अध्यक्ष पदम राना हए ”,,उनके बधाइ औ धन्यवाद दइरहए । नेपाल सरकार २०७६ सालमे रानाथारु जातके आदिबासीमे सुचिकृति औ भाषा आयोगमे रानाथारु भाषा फिर सुचिकृत होनसे जक महत्व और बढिगौ हए बताइ साँसद राना ।


कार्यक्रममे विशिष्ट पहुना सुदूरपश्चिम प्रदेशसभा सदस्य श्यामलाल राना रहएँ । बे कहि जा “उपन्यास भितर रानाथारुको भाषा , संस्कृति झल्कनबाले शब्द हए उपन्यास भितर रानाथारुको कथाबस्तु बहुत बढियासे सजो गओे हए सरल और अपन रानाथारु भाषामे होनसे बहुत अच्छिहए बताई औ कहि जासे आनबाले युवनके लेखनमे जाँगर अबय कहिके शुभकानमा दइरहए प्रदेश माननिय राना ।


ऐसि करके दुसरे विश्ष्टि पहुना कृष्णपुर नगपालिकाकी उपमेयर रमिता बडायक रहए बे कहि जा उपन्यास इकल्लो नहए जा से हमर हरात जाएरहि लोग गित भाषाके फिर संरक्षण होवैगो बताइ ।


जहे कार्यक्रममे रानाथारु भाषाको अर्धबार्षिक पत्रिका “सबेरो” को फिर बिमोचन भओ रहए । आगनबारी मिडिया प्रालिसे निकरो भओ प्रकाशित अर्धवार्षिक पत्रिका ‘सबेरो’के प्रकाशक सम्पादक नन्दलाल राना रहए । प्रालिद्वारा जासे पहिले रानाथारु डटकम और रानाथारु यूट्यूब च्यानल फिर चलातआएरहो हए ।


कार्यक्रममे सुदुरपश्चिम सहित्य समाजके उपध्यक्ष तिर्थराज पाण्डे , रानाथारु उत्थान तथा समन्वय मञ्चके अध्यक्ष धोखे राना , आदिबासि जनजाति सुदुरपश्चिम प्रदेश महासचिब राजकुमार राना , कृष्णपुर नगर पालिका –८ के वडा अध्यक्ष अमर सिंह राना लगायत समाजसेजवी, वुद्धिजिवीनको सहभागिता रहए । कार्यक्रम नेपाल रानाथारु समाजके अध्यक्ष तथा संविधान सभासदस्य कृपाराम रानाके सभापतित्वमे भओ रहए और कार्यक्रममे स्वागत मन्तव्य संस्थाके उपाध्यक्ष ओमप्रकाश राना करिहए कहेसे संचालन महासचिब भक्तराज राना करिरहएँ ।

सेयर कर दियो ।
  •  
  •  
  •  
  •  
  •  
  •  
  •  

विज्ञापन