विकासके नाउमे पहिचानए गुमन हिसाबसे विकास फिर का विकास, माननिय तारालामा तमाङ

विकासके नाउमे पहिचानए गुमन हिसाबसे विकास फिर का विकास, माननिय तारालामा तमाङ

पुनर्वास , २२ कातिक ।

विकासके नाउमे पहिचाननै गुमन हिसाबसे विकास करन फिर ठिक नहए जा बात सुदुरपश्चिम प्रदेश तथा नेकपा प्रमुख सचेतक माननिय प्रदेश सभा सदस्य तारा लामा तमाङ कहिरहएँ ।
पुनर्वास नगर पालिका स्तरिय रानाथारु उत्थान समन्वय मञ्चसे आयोजना भओ बार्षिक सधारण सभा तथा दशैदिपावली शुभकामना आदनप्रदान कार्यक्रममे कहिरहएँ । कोइ फिर बात पहिचानसे जुडो होतहए तौ रानाथारुको पहिचान भुइयाँसे जुडो हए भुइयाँ मन्दिर बनानपेती पहिचान मेटन हिसाबसे ना कि कित्तो बजेटमे कैसो बनानके हए पुरो नाप नक्सा देनपडो एक बर्षमे १० भुइयाँ मन्दिर बनन ताँहि प्रदेश सरकार बजेटको व्यवस्था करैगो बताइ हएँ ।,,


“ दुसरो बात हिन पर रानाथारुको पहिचान मेटन हिसाबसे बात होत रहए तओ हमर पहलमे लालझाडि गाउपालिका रानाथारुनको बाहुल बसोबास भओ पालिकाके रुपमे स्थापित करोगओ हए जानकारी दइहए ।” ऐसीकरके बहुत औ खासकरके विपक्षि पाटिके लोग अरोप लगात हए सरकार विकास नकरी कहिके उनसे मिर प्रश्न हए ।
“का विकास नकरी भरखर राज्य संघिय संरचनामे गओ हए संविधानसे लैके कानुन निर्माण करन काम जहे सरकारके नेतृत्व होन डटो हए तहि लागत हए पर ऐसो ना हए १० बर्ष अग्गुको विकास औ अभयको विकासमे अकास पतालको विकास भओ कहिहए प्रमुख सचेतक लामा ।”


कार्यक्रमके विश्ष्टि पहुना लालझाडि गाउपालिकाके अध्यक्ष मदनसेन वडायक रहएँ । “बे कहि रानाथारु पच्छु ना हए राज्य व्यवस्था संचालन करनबाले आदमी हमके पचछु करेहएँ कहिके अरोप लगाइहएँ । काहे कि संघ औ प्रदेश सरकार स्थाइ औ करारमे बहुतसे जागिर निकारी हए कित्तो कोटा हमर रानाथारुके ताँहि सुनिस्चित करिहए । ऐसीकरके भरखर नेपाल सरकार रानाथारु जातिके अलग्य आदिवासी जनजातिमे सुचिकृत करी हए पर इतकाएसे हमर आवश्यक्ता पुरो नाहोनबालो हए । हमर अपन माग पुरी करवान हए कहेसे राजनितिमे पहुचसे लैके सरकारी नोकरीमे अवसर देनपडो कहिके बताइ रहए गा.पा.अध्यक्ष वडायक ।”


ऐसीकरके कार्यक्रमके दुसरे पहुना पुनर्वास नगर पालिका वडा नं. १० के वडा अध्यक्ष सुकदेव राना रहएँ , “बे कहि और स्थानिय तहसे पुनरर्वास नगर पालिकामे बैठनबाले रानाथारु अग्गु हए बताइ । रानाथारु उत्थान समन्वय मंचको लओ डाटा अनुसार शिक्षीत जनशक्ति जद्धि हए बताइ औ कहि कि पुनर्वास नगर पालिका रानाथारु औ चौधरी थारु करके ३२ भलमन्सनके जनहि बार्षिक रु पाँच हजार नगद रकम देत हए और आनबालो आर्थिक बर्षमे गावके चाकर औ गौटेहरा भर्रानके ताँहि फिर रकम विनियोजन करन पडो कहिके हम नगर पालिकामे प्रस्ताव लैगए हए बताइ हए ।
भिमसेन सेवा समितिके दिनदयाल राना , शिक्षक सेवा राना , सिमरी सत्संग व्यवस्थापन समितिके अध्यक्ष शिवराम राना लगायत कार्यक्रममे शुभकामना दइरहएँ औ कार्यक्रममे पुनर्वास नगर पालिकाके १२ राना गावके भलमन्सानको उपस्थित रहए ।


कार्यक्रम संस्थाके अध्यक्ष धोखे रानाके सभापतित्वमे भओ रहए । स्वागतमन्तव्य फुल्लन राना कहिरहए औ आर्थिक वर्ष २०७६।०७७को आम्दानि खर्चको रु १लाख ६ हजार ३ सय २४ बराबरको प्रतिवेदन संचालक तिर्थ राज राना सुनाइ रहएँ ।

सेयर कर दियो ।