दिनेश राना, धनगढी । थारु जनकल्याण संस्था लखिमपुर खिरी होनहार छात्रछात्रानके सम्मानित करिहए । चनदनचौकी रामनगर गांवमे एक कार्यक्रमके विच उनके सम्मानित करिहए । संस्थाके अध्यक्ष छैलविहारी रानाके अध्यक्षतामे भव कार्यक्रमके प्रमुख पहुना अधिशासी अभियंता बीएसएनएल रमाशंकर राना और विशिष्टअतिथी रेखा राना रहए ।

कार्यक्रमके बरेम संस्थाके उपाध्यक्ष ओमप्रकाश राना बताई मेधावियों छात्रछात्राकी हौसला बढन ताँही जा सम्मानित कार्यक्रमको आयोजना करोगव हए । हमर थारु क्षेत्रमे ऐसी प्रतिभा हए जौन अग्गु चलके हमर क्षेत्र और देशकी नाम रोशन करए । पर हभए तक पुरो थारु क्षेत्रमे अभए तक एक फिर आइएएस या आईपिएसमे नाम निकार नपाइहए ।

जक ताँही सव जनी प्रयास कररहे हए । उनकी कहाइ हए कि अइया दौव अपन बचनमे ध्यान देमय कहाँ जातहए का करत हए । पढाईके संग अपन रानाथारु संस्कृति और परम्पराके नछोडएँ कहिके बताइए वरिष्ट उपाध्यक्ष राना । कार्यक्रममे विशिष्ट अतिथी रेखा राना करीव सौ बुजुर्ग महिला पुरुषनके कम्बल बाँडिरहए ।

और कार्यंक्रममे कोतवाली प्रभारी मनोज कुमार , मंगल चौधरी, रामचन्द्र राना, बल्देव कुमार श्रीवास्तव, बासुदेव राना, राम निवास राना लगायतकी उपस्थित रहए ।