संपादक नन्दलाल राना, धनगढी । रानाथारु समाज खिरीमे लुप्त भई संस्कृतिक होरी नृत्य कार्यक्रम के पुनर्जिवित करन के ताँहि नझोटा गाँवके पुर्व प्रधान फुलन देवी रानाके आयोजनामे फागुन २९ गते (१३ मार्च २०२५) होरी दहन कार्यक्रम मनैया हए । कार्यक्रम साँझ ८ बजे से रात १२ बजे तक चलैगो कहिके बताइ हँए नझोटा गाँवके पधना ओमप्रकाश राना ।
कार्यक्रमके मुख्य आकर्षक नेपाल रानाथारु समाजके केन्द्रिय अध्यक्ष कमल सि रानाको प्रवचन, होरी नृत्य कार्यक्रममे नेपाल- भारतकी चर्चित लोक गायिका अन्जली राना, लक्ष्मी राना, सिता राना, ममता राना और गायक रामसमुझ रानाकी वेजोड प्रस्तुति होवैगी । बहे दिन साँझक रानाथारुको वडो तिउहार होलीका दहन हाेवैगाे । जा कार्यक्रम आयोजना करनको खास उद्देश्य लुप्त होन जाइ रहि संस्कृतिक होरी नृत्यके संरक्षण और संबद्घन करन ताँही हए ।
रानाथारु समुदायमे जा तिउहार एक महिना आठ दिन तक मनात हए । माह पुरनमासिक दिन से होरी धरत और एक महिना जिन्दा होरी खेलत हए और फागुन पुरनमासिक दिन होरी डुगत (होलीका दहन) हए दुसरो दिन डुगीहोरीक टिका लगातय आठ दिन तक मरी होरी खेलत और अन्तिम खख्डेहराक दिन होरी विदाइ करत हए ।
होरी तिउहार भाईचारा विचको स्नेह भतृत्वको सम्बन्ध वनात हए । होरीको तिउहार रंग अविरको तिउहार इकल्लो न हए जिजा शाली विच और देवर भौजी विचको नाताके प्रगड ( मजबुत) बनान काम फिर करत हए ।
