धनगढी,२० माह ।

नेपाल रानाथारु समाजके आयोजनामे पहिलो रानाथारु सुचिकृत दिवस २०७७ कञ्चनपुरमे भव्यरुपमे मनाइहएँ । कार्यक्रम संस्थाके अध्यक्ष तथा संविधान सदस्य कृपाराम रानाके अध्यक्षतामे सम्पन्न भओ हए ।कार्यक्रमके बडेपहुना विघटित प्रतिनिधि सभाके माननिय नारदमुनि राना रहएँ । बे कहि नेपालके प्रधानमन्त्री केपी शर्मा ओली अगर ना होतो त साइत आज रानाथारुको सुचिकृत फिर नाहोतो बताइ रहएँ । नेपालमे ६० नम्बरमे रानाथारु जाति आदिवासी जनजातिकी सुचिमे सुचिकृत भइहएँ बतइ ।
कार्यक्रमके विश्ष्टि पहुना सुदुरपश्चि प्रदेश सदस्य माननिय श्यामलाल राना रहएँ । कार्यक्रमेके सम्बोधन करत कहि थप अधिकारके ताँहि एक जुटहुइके लागनके अपिल करिहएँ ।
ऐसीकरके कार्यक्रमके दुसरे विश्ष्टि कृष्णपुर नगर पालिकाके नगर प्रमुख कर्ण बहादुर हमाल रहएँ । नेपाल सरकार कैलाली कञ्चनपुर जिल्लामे बैठनबाले रानाथारु जातिके बहुतबडो गुन लागाइहए अब रानाथारु समुदायको भाषा अभिलेखिकरणमे जोडदेन पडैगो कृष्णपुर नगर पालिका जक ताँहि एक लाख रुपैया विनियोजन करिह कहिके जानकारी दइहए ।
कृष्णपुर नगरपालिका की नगर उपप्रमुख रमिता राना लगायत कृष्णपुर नगर पालिका ८ के वडा अध्यक्ष अमरसिह् राना , कञ्चनपुर जिल्ला समनव्य समिति सदस्य डिट्ठा राना , सदस्य एकरानी राना , आदीवासीजनजाति महासंघ सुप. प्रदेश महासचिब राजकुमार राना प्रथम रानाथारु सुचिकृत दिवसको हार्दिक शुभकामना दइरहए ।
कार्यक्रममे रानाथारु समुदायसे नेपालकी बिभिन्न क्रान्तिके बेला सहदत्तप्राप्त करेभए सहिदनको नाम सर्वजनिक करिहए । सहिद कैदु राना ,नन्दलाल राना,विलाय राना,सुरेश राना,हापु राना,सार्जुन राना , गन्नु राना ,दल्ला राना , कल्लु राना, फुल्वु राना,अनिता राना,लोहरा राना,देशराज राना , मंगल राना , होरीलाल राना को नाम सर्वजनिक करिहए । जे सहिद मैसे होरीलाल रानाके इकल्लो सहिदकी सुचिमे सुचिकृत हए वाँकीनको नाम फिर सहिदकि लिस्टमे समेटनके ताँहि नेपाल सरकारसे पहल करनकी बात कहिहए संस्थाके अध्यक्षा राना।
कार्यक्रमके स्वागत मन्तव्य उपध्यक्ष ओमप्रकाश राना करिहएँ कहेसे संचालन महासचिब भक्तराज राना करिरहएँ । कार्यक्रममे विभिन्न गाउँकी नाचकि पस्तुती दिखाइरहएँ ।

जाहु पढौँ

धनगढी वडा नं. ७ मोतिचोक मे पहिलो रानाथारु सुचिकृत दिवस २०७७ दिप प्रज्वलन करके मनाइहएँ । गत बर्ष २०७६ माघ २० गते नेपाल सरकारकी मन्त्रिपरिषदसे रानाथारू जतिके अादिवासीमे सुचिकृत करिरहए बहेक खुशीमे दिप प्रज्वलन करके मनाएहए बताइ देवहरिया समुदायिक वन उपभोगता समुहके अध्यक्ष भजन राना , दिप प्रज्वलन कार्यत्रममे धनगढी उपमहानगर पालिका ७ के वडा अध्यक्ष सिताराम राना सबय समुदायबासीनके हार्दिक शुभकामना व्यक्तकरिहएँ । सुचिकृत करानमे आहम भुमिका खेलनबारे तमान अग्रज ब्यक्तित्व प्रतिहार्दिक धन्यवाद दइहएँ । ऐसिकरके बेहडाबाबा माध्यमिक विद्यालयके शिक्षक प्रेमचन्द राना , नबजोति सहकारी संस्थाके उपा अध्यक्ष मेघनाथ राना लगायत देवहरिया गाउँ औ मनेहरा गाउँके ब्यक्तिनको उपस्थित रहएँ ।