लाझाडी,८ पुस ।

कञ्चनपुरके लालझाडि गाउपालिका १ विनबासी और पुर्नवास नगरपालिका २ अमखैया जोडके दोदा नदीयामे झोलुङ्गे पुल निर्माण भइहए ।स्थानिय सरकारके पहलमे दोदामे पुल निर्माण होनसे स्थानिय हर्षित भए हएँ ।
स्थानियके अनुसार लालझाडी गाउँपालिकाके पहलमे पुल निर्माण भइहए । पुल निर्माण संगय हिनके स्थानिय खुशीभए हएँ ।
लालझाडी गाउपालिकाके प्रमुख मदनसेन बडायक चुनावमे जनताके संग करो बाचा पुरा करीहए बताइ स्थानिय पदम राना ।बे कहि लालझाडी गाउँपालिका प्रमुख बो बेरा हमर माग सुनि और आज पुरा करके छोडिहएँ ।

हम लालझाडीबासी , बेलौरी, बेलडाँडी लगायत भारत जानके ताँहि पुल ना होनसे जोखिनमपुर्ण यात्रा करन बाध्यता हटीगौ ।हमके रोजदिन काम करन ताँहि इतएउतए जान पडहए तओ जोखिम मोललएके नदिया नाघन पडन बाध्यता रहए पर अब बो हटीगौ बताइ ।
स्थानिय अगुवा गोपाल रेग्मी कहि पुल निर्माणसे हिनके स्थानियक सामाजिक आर्थिक एव साँस्कृत गतिविधिमे सहजता आओ बताई ।

पुर्वधार विकास कार्यालयसे निर्माण भओ पुलको लम्बाई २ सय मिटर हए । पुर्वाधार विकास कार्यालय कञ्चनपुरके सुचना अधिकारी खेमराज भट्ट कहि करिब १ करोड ९९ लाख लागतमे पुल निर्माण भओ बताई । पुल समयमे निर्माण होनसे स्थानियनके आनजानके सहज भओ हए ।

लालझाडि गाउँपालिकाके प्रमुअ मदनसेन बडायक कहि स्थानिय सरकारसे दोदा नदीयामे तीन पुल निर्माणके ताँही संघिय सरकारमे प्रस्ताब माग करेरहएँ । हम जनताक माग और चाहना अनुसार पुल निर्माणके ताँहि उपरकी निकायमे प्रस्ताब पेश करेरहएँ । बे कहि जा हमर चुनाबी प्रतिबद्धता फिर रहए । लालझाडीके और पालिकासे जोडन ताँहि झोलङ्गे पुल सहित पक्की पुलके ताँहि फिर पहल हुइरहो हए । क्रमागत पुल समयमे सम्पन्न करन ताँही स्थानिय सरकार घचघच्याइ रहोहए कहिके गाउपालिका अध्यक्ष बडायक बताई ।