सामनकि गित प्रतियोगित २०७७ काे पुरस्कार वितरण

सामनकि गित प्रतियोगित २०७७ काे  पुरस्कार वितरण

कञ्चनपुर,२३ भादाैँ ।
नेपाल रानाथारु समाजके आयोजनामे बेलौरी नगर पालिकाके आर्थिक सहयोगमे पहिलो रानाथारु सामनकि गित प्रतियोगिता २०७७ सामन महिनाक ३ गतेसे ८ गते तक संचालन भओ रहए । प्रतियोगिता रानाथारु डटकम कि फेसबुक पेच अनलाइन मार्फत संचालन भओ रहए ।
प्रतियोगिता कार्यक्रम समान महिनाक ८ समापन भओ रहए पर देशमे कोभिड १९ के कारणसे पुरुषकारको बितरण करन रहिगओ रहए । मंगरके राेज सोसलडिस्टेन्स करके सहाभागिनके उपस्थितिमे पुरुषकार वितरण करिरहएँ ।


पुरुषकार वितरण कार्यक्रमके प्रमुख पहुना बेलौरी नगर पालिकाके नगर प्रमुख पोतीलाल चौधरी रहए ।बेलौरी नगर पालिका सबय जातजातिको भाषा संस्कृतिके सम्मान करत हए ,और रानाथारु जाति अभय भरखर आदिबासि जनजातिमे अलग जातिके रुपमे सुचिकृति भओ हए मय सम्पुर्ण रानाथारु समुदायके हार्दिक बधाइ देतहौ बताइहए नगर प्रमुख चौधरी । और बे कहि अब थप अधिकारके ताँहि एक जुटहुइके लगन पडैगो बताइरहए ।


कार्यक्रमके विशिष्ट पहुना बेलौरी नगर पालिका वडा नं. ८ के वडा अध्यक्ष नन्दकुमार राना रहए । ऐसीकारके कृष्णपुर नगर पालिका वडा नं. ६ के वडा अध्यक्ष अमर सिंह राना,आदिबासि जनजाती महासंघ सुदुरपश्चिम प्रदेशके महासचिब राजकुमार राना , महिला महासंघ कञ्चनपुर जिल्ला अध्यक्ष प्रेमबती राना लगात कार्यक्रम सफलताको शुभकामना दइरहए ।
कार्यक्रममे स्वागत मन्तव्य नेपाल रानाथारु समाजके उपाध्यक्ष ओमप्रकाश राना करिरहए । कहेसे कार्यक्रम संस्थाके अध्यक्ष कृपाराम रानाके सभापतित्वमे भओ रहए ।


कार्यक्रम समापन करत अध्यक्ष राना कहि विश्वको कोभिड १९को विशमपरिस्थितिमे पुरुषकार देनमे थोरी ढिलो हुइगओ पर जा नरहए कि पुरुषकारय नदेनो पर कछु लोग जाके विभिन्न किसिमको भ्रमसृजना करन और अन्य संस्थासे दाँजन समाज भडनकाम करिहए बो ठिक नहए बताइरहए । कार्यक्रम आनबाले दिनमे फिर नेपाल रानाथारु समाजके नेतृत्वमे होबैगो बताइरहए ।


कायक्रमको संचालन संस्थाके महासचिब भक्तराज राना संचालन करिरहए । कायक्रममे पहिलो , दुसरो और तिसरो भए प्रतियोगिके क्रमशःनगद पाँच हजार , तिन हजार, दुइहजार और प्रमाण पत्रसे सम्मान करिरहए ।
ऐसीकरके बडिमुडियान , अच्छो शब्द संकल , बढीया अवाज बालिनके क्रमशः नगद पाँच सयके दरसे और सहभागि सबयनके नगद दुइसय और प्रमाण पत्र दइके सम्मान करिरहए ।

सेयर कर दियो ।

विज्ञापन