धनगढी,३२ जेठ । रानाथारु डटकमसे संचालित मिति २०७७।०२।३१ गतेको कचेहरी कार्यक्रम मे हमर पहुनालोग उठाइ टिप्पणी कि बातमे हमरो ध्यानाकर्षण भओ हए । खास करके संबिधानसभा सदस्य प्यारेलाल रानाज्यू से उठो बातके हिनाके स्पस्ट करन चाहत हएँ। अत: जे विषयमे तथ्यगत रुपमे अपनी बात धरन चाहत हएँ । विश्वभर कोरोना रोगकि महामारीसे बचन सबसे प्रभावकारी माध्यम कहेक लकडाउन हए औ लकडाउनको पालन करन , सामाजिक दुरी कायम करन और जाके सङ्गए घरे बैठे बैठे अपन संस्कृति पहिचान, संरक्षण सम्बर्धन और अपनो कला और प्रतिभाके मौलिकताके सङ्ग उजागर करन उद्देश्यसे ‘प्रथम रानाथारु अनलाइन “कबिता” और “चित्रकला” प्रतियोगिता संचालन करे रहएँ और रानाथारु अनलाइन ‘फोटो’ तथा ’विषयबस्तुमे आधारित शब्दकोष’ प्रतियोगिता हाल संचालनमे हए । कोइ व्यक्तिगत, समुहगत, दलगत स्वार्थमे जा कार्यक्रम संचालन ना भओ हए । जामे हमरो अपनो श्रोतसे पुरुस्कार लगायतकि व्यवस्थापनमे अभेतक करिब २० हजार रुपैयासे जाधा खर्च हुइ गओ हए, जामे कोइ सरकारी रुपैया खर्च ना भओ जानकारी करात हएँ । औपचारिक हिसाबमे पहिलो कार्यक्रम समापन भओ रहए, और विविध क्षेत्रके कैलाली, कंचनपुर लगायत भारतके उत्तरप्रदेश और उत्तराखंडके अग्रज ब्यक्तिलोग शुभकामना फिर दई रहएँ , संबिधान सभा सदस्य प्यारेलाल रानाज्यूसे फिर शुभकामना देनको अनुरोध करे रहएँ । नेपाल रानाथारु समाजसे फिर जा कार्यक्रमको छलफल सहित शुभकामना आओ रहए । प्रतिनिधिसभा सदस्य माननीय नारद मुनी रानाकि प्रमुख आतिथ्य और नेपाल रानाथारु समाजके अध्यक्ष कृपा राम रानाज्यूकि विशिस्ट आतित्थ्य मे जा कार्यक्रमको पहिलो चरण समापन भओ सन्दर्भमे जा कोइ लुकाएके वा गोप्यरुपमे भओ कार्यक्रम कहन ना मिलत हए । जा कार्यक्रमको सहजकर्ताको भूमिका निर्बाह करदेन कमल सि रानाके संयोजक सहित ५ सदस्यीय आयोजक औ ५ सदस्यीय प्रतियोगिता जजमेन्ट समिति बनाएके कार्यक्रम संचालन करेरहएँ । दुसरो चरणको कार्यक्रम कमल सिंग राना , दिनेश राना दुई जनीककि संयोजकत्वमे कार्यक्रम संचालन होनडटो हए । अइसी कार्यक्रममे समाजके बिबिध क्षेत्रके बिबिध ब्यक्तित्व जिम्मेबारी पुरा करी हएँ । सल्लाहकार, जज, प्राविधिक लगायतकि कार्यक्रमको महत्वपुर्ण भुमिका निर्वाह करनबाले नारायन राना, भानुप्रताप राना, भंगी(भगत) राना, रामप्रसाद राना, जानमती राना, उमेश राना, सुरेन्द्र राना , बिपिन रावत , कमल राना लगायत व्यक्तित्व साथ औ सहयोग करिहए, साथए समाजके अगुवनसे बारम्बार सल्लाह लेनको काम भओ हए । प्रतियोगीतामे प्रतिक्रिया सुझाव सल्लाह फिर खुला हए, और आज जौन फोटो प्रतियोगिता सन्दर्भमे अभिव्यक्ति आइहए बो बातमे समाजके तर्फसे अभतक कोइ नकारात्मक प्रतिक्रिया ना आओ जानकारी करात हए । रानाथारु आदर्श युवा क्लबकि विषयमे भओ टिप्पणीमे जा क्लबकि योगदानके विषयमे थोरी जानकारी देनचाहत हएँ। विगत एक दशकसे खेलकुद कि माध्यमसे रानाथारुके चिनान बालो , इतिहास सुसुज्जित सुदूरपश्चिमको एक अग्रणी युवा क्लब हए । जा कार्यक्रमसे समाजमे सकारात्मक प्रभाव और कुछ नयाँ कामको सुरुवात भओ सन्देश जाबैगो आशा लेत हएँ । अन्तमे, कोइ भि अपने कार्यक्रमके सुरक्षात्मक बनान ताही हमर जा कार्यक्रके ना जोड़ देहएँ अनुरोध करन चाँहत हए । संगए, जा कार्यक्रम नितान्त सामाजिक होनके कारण कोइ व्यक्तिगत, समुहगत, दमलगत स्वार्थमे जा कार्यक्रम संचालन ना भओ हए । कोइके व्यक्तिगत रुपमे आक्षेप लगानो जा गलत बात हए कोइबातमे चित्त ना बुझो हए कहेसे छलफल करन हम तयार हएँ ।