धनगढी , ३० चैत २०७६ ।

२०७६ साल त्रासदीके बीच आपनसबको घर आँगनसे बिदाइ लेनजानडटो हए । वर्षके अन्त्यमे विश्वव्यापी रूपमे फैलो कोरोना भाइरस सङ्क्रमणके कारण लकडाउनमे घरमे बैठे बैठे थकान महसुत हुइरहो ऐसो अवस्थामे आपनसब जनी २०७७ सालको स्वागत करनपडरहो हए । अनेक उतारचढावके बीच आज आधिरातसे २०७६ साल बिदा करके नयाँ वर्ष २०७७ साल लागजाबैगो । गओ वर्षमे आपनसंग बहुत महत्त्वपूर्ण घटना भएहएँ , जौन सम्झन लायक हएँ । २०७६ के सुरुमे खासए चर्चायोग्य घटना नभएसे फिर बर्षके बिचमे आइके थोरीबहुत सकारात्मक औ नकारात्मक दुनो घटना होनपुगे ।
औ का का भओ त २०७६ सालमे ?

३लाख ५० हजार जनसंख्या कैलाली औ कञ्चनपुर जिल्लामे बैठनबाले रानाथारुनको चाड पर्वमे एकरुपता आबय कहिके बर्षको शुरुवतीमे कैलाली , कञ्चनपुरके सरोकार बालेन संग तिथीके बारेम छलफल करन औ बार्षिक क्यालेनडरके ताँहि तिथीमिथीको घोषण करनको शुरुवात ।

२०७६ बैशाख १५ गते चराँइ पर्वको बेलौरी नगर पालिका स्थानिय स्तरमे विदा देनको घोषण करीरहए ।
२०७६ कातिक १८ गते भाषा आयोगमे रानाथारु भाषाके सुचिकृत भओ । नेपालमे १२५ भाषामे बोलनबालो भाषामे थप ६ भाषामे रानाथारु भाषाके फिर भाषा आयोग सुचिकृतको मान्यता दइहए ।

२०७६ साल जा हिसाबसे फिर महात्वपुर्ण रहो विगत १० बर्षसे स्थतिग नेपाल रानाथारु समाजको अधिवेशन ०७६ अगहन १७ गते नेपाल रानाथारु समाजको रुकोभओ अधिवेशन सफलतासे निभटो ।

२०७६साल बर्षऔको सपना पुरो भओ नेपाल सरकारकि मन्त्रिपरिषदसे ०७६ माघ २३ गते रानाथारु जातिके अलगयसे आदिबासिजनजातिमे सुचिकृत करीहए । जाति सुचिकृतके खुशिमे रानाथारु समुदाय दिप प्रज्वालन करके दिबारी मनाइ ।

०७६फागुन १५ गते कविता महोत्सबको समुदघाटनको शुभअबसरमे १७ गते सम्माननिय राष्टपतिक श्रीमति विद्यादेवी भण्डारी ज्युके सम्मान स्वारुप मायाँको चिन्हा प्रदान ।

रानाथारुको महान तिउहार होरीको अन्तिम दिन खख्डेहरा पर्वके अबसरमे २०७६ चैत ९ गते प्रदेश सरकारसे खख्डेहरा पर्वके बारेम पहिलो दफेर छुटी दइहए सबय रानाथारु समुदाय प्रदेश सरकार प्रति कृतज्ञता प्रकट करीहए ।

प्रत्यक बर्ष राजपुर गाउमे नयाँ बर्ष मनात आएरहे हए बहेक खुशिमे मननिय नारदमुनि रानाके पहलमे केन्द्र सरकारसे ११ करोडको लागतमे २०७६ साल मे राजपुर गावमे रानाथारु विकास भवनको शुरुवात ।
रानाथारु भाषाको पहिलो औ एक मात्र अनलाइन न्युज पोटल विगत बर्षमे मोहराइन प्र.लि द्वार चलत आएरहो रहए पर २०७६ सालसे रानाथारु डटकम आँगनबारी मिडिया प्रा.लि के नामसे सुचना विभागमे दर्ता हुइके संचालनमे हए ।

फागुत ३ गते नेपाल सरकारके वधाइ औ शुभकामना देनताँहि आयोजित सभामे माघ २३ गते रानाथारु आदिवासी जनजातीमे सुचिकृत भओक खुशिमे माघ २३ गते रानाथारुको स्वर्ण दिनके रुपमे प्रत्येक वर्ष समझना स्वारुप मनामंगे कहिके नेपाल रानाथारु समाजसे घोषणा करी हए ।
रानाथारु भाषामे अर्धवार्षिक पत्रिका उजियारो रानाथारुको प्रकाशनको शुरवात भओ हए ।

नेपाल औ भारतमे बैठनबाले रानाथारुनके विच संस्कृतिक एकरुपताके ताँहि रानाथारु डटकम कि टिम उत्तरतखण्ड भारतमे बह्रा राणथारु स्मारिकाकि भ्रमण औ बह्रा राणास्मारिका समिती सदस्यनसे संस्कृतिक एकरुपताके बारेम छलफल शुरुवात ।

कमल रानाके प्रयासमे एसियाको प्रख्यात प्रथम बुक्समे रानाथारु डिजिटल लाइब्रेरीको शुरुवात भओ हए डिजिटल लाइब्ररिमे बच्चनके पढन ताँहि रानाथारु भाषामे काथा कविता पढन औ देखन मिलेहए डिजिटल लाइब्रेरीमे ।