कञ्चनपुर, १५ चैत २०७६

संसार भर महामारी को रुप लैडारी कोभिड 19(कोरोना) भाइरस के रोकथाममे सबए देश लगे पडे हए अपन अपन तरिकासे । बहुत देसमे अभे लकडाउनको अवस्था हए ऐसिए भारत, नेपाल फिर लकडाउनकि स्थितिमे गुजर रहे हएँ । जा भाइरसके बारेमे बहुत से भ्रम फैलरहे हए । घरमे बैठे बैठे बहुत आदमी सोसल मिडियासे दुनियाँ भरकी जानकारी लैरहे हैं ऐसेमे हमर जैसे अशिक्षित समुदायमे बहुत भ्रमात्मक समाचार, सन्देश दुनियाँ कि हँसी बनरही हए । कल्ल सन्झाके एक उल्का अवाज सहित धर्तिमे झरो खबर सङ्गए आज सबेरेसे तमान घरको उरियानी, आँगन खोदिं समाचार मिलो हए । हल्लए हल्लामे मोहल्ला खुदे गए हएँ । फेसबुकमे एक माताको सन्देस कहिके सबेरेस अपन अपन घरकी अग्गु दिउता किनारे, आँगन खोदके कुइला निकरैगो बो कुइलाकी टीका लगाए से कोरोना से बचसकत कहिके आओ भओ गलत, बेतुकी सन्देस तमान गाउँ मे फैलो हए । जहे हल्लम तमानकि उरियानी खुदी गै हैं । ऐसिए खोदनबारी पिपरिया गाउँकी एक महिला (अनिफुल राना) से जा बारेम पुँछन पेति बे बताइँकी कुइला त ना निकरो कारी मट्टिको टीका लगाए हम त, ऐसिए हल्लाके भरमे खोदनबाली उनकि परोसिन बताइँकी कुइला ना निकरो सिकटी निकरी हमु कारि मट्टि को टीका लगाए । जा हल्ला पिपरिया इकल्लो नाए ऐसिए लगभग सबए गाउँमे फैलो हए औ खोदिं फिर हएँ । जा नितान्त रुढीबादी सन्देश हए , जासे पता चलत हए कि हमर चेतनाको स्तर कितका हए ऐसे हल्लाके पिच्छु कोइफिर ना दौरए औ कोरोनासे वचन ताहिं अपने घरै कुचे रहन औ सरकारके नियम अपनी स्वास्थके ताहिं पालन करन हए ।

भ्रम फैलानबारे व्यक्तिनको ढुढनकाम हुइरहाे हए बताइ जिल्ला प्रहरी कार्यालय कैलालीक प्रहरी नायव उपरिक्षक दक्षकुमार बस्नेत अैा, कहि एेसे झुटमठ बात करनबालेनकि पछु नलागनके सरकार आह्वान करिहए लकडाउनके साथ देन आवश्यक हए। गलत हल्लाके पछुनलागके भ्रम फैलानबाले व्यक्तिको पहिचान करानमे सहयोग करंए।’