धनगढी,१२ चैत २०७६

रानाथारु जनसमुदयमे परम्परागत रुपसे मनातआएरहो चराँइ पर्व हएँ । सामाजिक , साँस्कृतिक एवं धार्मिक महत्व भओ “चैत कि चराँई” जहे चैत १३ गते बिस्पतके रोज पडिहए , विगतके बर्षमे भव्यताके साथ मनात आएसे फिर जा बर्ष विश्वव्यापी रुपमे देखापडो कोराना भाइरस ( कोभिड–१९ ) महामारीक कारण देशसे लकडाउन भओ परिस्थीतमे जा रोगसे बचन ताँहि नेपाल सरकार अत्याश्यक समानबाहेक घरसे बाहेर ननिकरनको आदेश दइहए । बैठकमे जहु कहि हए सङ्क्रमक रोग ऐन, २०२० को दफा २ मे दओे अधिकार प्रयोग करके रोकके निर्मूूल करन ऐसो आदेश देनको निर्णय करोगओ हए । आदेशमे जहु कहोगओ हए “औषधोपचार, खाद्यवस्तु खरिद अत्यावश्यक कामबाहेक कोइ फिर आदमी घरसे बाहिर ननिकरनके ।”
ज्यान हए त जहान हए अच्छे रहे तओ दुसरो बर्ष बढीयासे मनाएँ लेहएँ तहिकमारे ऐसो आवस्थामे चैत कि चराँइ पुजा एसे करके मनान आन्तरिक रुपमे सामान्य पुजा पाठ करके सुसम्पन्न करन सम्बन्धित सबयमे हार्दिक अनुरोध करिहएँ नेपाल रानाथारु समाज केन्द्रिय कार्यसमिती अध्यक्ष कृपाराम राना । औ चराँइ पर्वकि हार्दिक मंगलमय शुभकामना दइहएँ ।
देवहरिया गाउको पधना पृथ्वी राना कि कहाइ अनुसार चाकर सब घरसे पुजा समान उठाइके पधना भलमन्सा चाकर औ भर्रा मिलके चराँइक पुजा करंगे बताइ ।
धनगढी गाउके भलमन्सा भज्जी राना कहि हमर गाउमे चराँइ पर्व ऐसे मनाइया हएँ बैयर अपन अपन घरसे पुजा समान चराँइ चरतरन बहेवगीयामे दइके आजामंगी बैठनको व्यवस्था नहए एसे करके चराँइ पर्व मनामंगे बताइ।
ऐसीकरके कैलालीके भलमन्सा तथा भलमन्सा समितीके अध्यक्ष मोली राना कहि चाकरसे गाउमे पुजा समान उठवालेन भर्रा औ चाकर जाएके चराँइको पुजा करंगे कहिहएँ ।
रानाथारु उत्थान समुन्व्य मञ्च पुनरवास कञ्चनपुरके अध्यक्ष धोखे राना कहि हमर पुनरवास नगर पालिका भरके भलमन्सा अपन गाउमे चाकरसे पूजा समान उघाएके चाकर औ भर्रा मिलके चराँइको पुजा करंगे बताइ ।
बेला गाउसे राना कला एवं संस्कृति संरक्षण समाजके अध्यक्ष महाविर राना कहि पुजा करनय हए तहिकमारे अपनघरमे पको पकवानके चाकर उठाएके लाइके चराँइ पर्व मनाके अपन गाउको भलमन्साके सल्लाहा दइहएँ ।
सबय जनी ऐसीकरे चराँइ पर्व मनान अनुरोध करिहएँ औ माता भगपितसे चराँइ पर्वकाे उपलक्ष्यमे देशमे कोरानाको प्रकोपसे बचेरहमयँ औ सबयके घरअाँगनमे सुखशान्ति रहमयँ हार्दिक शुभकामना दइहएँ