धनगढी,२३ फगुन

रानाथारुक सब्से बडो त्युहार होरिके अबसरमे रानाथारु भासामे नयाँ गीत सार्बजनिक भै हए । नेपाल आर्मीमे १५-१६ बर्षसे जागिर कर्त आए कंचनपुर ढडा गाउँके रामु राना अपनो समुदायको सब्से बडो त्युहार होरिके उपलक्ष्यमे जा आधुनिक गीत बनाइ हएँ । देशको सेवाके सङ्गए अपन समुदायके ताहिँ कुछ करन सोच भए रामु राना अपन गीत मे अप्नए ना गाएके लक्ष्मी राना औ नारायण राना से गीत गबाइँ हएँ । जा गीत आधुनिक होएसे फिर जामे रानाथारुको मौलिकता ना हराए कहिके रानाथारुको लोक भाका  सबेरेक पहर कि गीत “खिड्किनपे ठाडी देख राधे लौंडा बजाए…” बोलमे रानाथारुन्को हरातए जाए रहो सादा होरिक ताल बजो हए औ बिच बिचमे कलाकार होरिको डंका फिर बजो हए । आजकाल हर कार्यक्रममे होरि देखन त मिलत हए पर पहर औ बखतकि गीत दिनए दिन हरान से रानाथारुको होरिको मौलिकता हरानोके मारे जा गीतके माध्यम से लोकभाका औ अप्निए वास्तविक ताल से जा गीत सुरु करे हैं कहिके गायक औ जाके अरेन्ज सहयोगी नारायण राना बताइ हैं । आधुनिकतामे लोक भाका जुडो जा ऐसि गीत हमर हरानो सुर तालके पुनर्जीवन दैसकत हए औ जा तरिका जटिल होएसे फिर अपनत्वके ताहिं जरुरी फिर हए । जा गीत को भिडियो छयाँकन हुइरहो होरिक टिकासे पहिलिए जल्दिए भिडियो रानाथारु डटकम से सार्बजनिक करङ्गे कहिके निर्माण पक्ष से जानकारी मिलोहए ।