दिनेश राना,
कैलाली । धनगढी उपमहानगरपालिका वडा नं.७ मनेहरा, कैलालीमे चौथो मनेहरा कप २०८३ खुल्ला वडास्तरीय पुरुष भलिबल प्रतियोगिता आयोजना हुबइया हए । प्रतियोगिता जहे २०८३ साल असोज १६, १७ और १८ गते मनेहरामे सञ्चालन हुबइया हए करके आयोजक बताइ हएँ ।
स्थानीय स्तरमे भलिबल खेलकी विकास और विस्तार करन, खेलाडीनकी प्रतिभा पहिचान करन और खेलाडीनके प्रतिस्पर्धात्मक अवसर प्रदान करन उद्देश्यसे प्रतियोगिता आयोजन करन डटे हएँ । खुल्ला वडास्तरीय पुरुष भलिबल प्रतियोगितामे तमान् वडा और क्षेत्रके टिमकी सहभागिता रहइगो करके आयोजक अपेक्षा करी हएँ । प्रतियोगितामे उत्कृष्ट प्रदर्शन करके पहिलो स्थान हासिल करन बाले टिमके नगद रु.३० हजार, दुसरो स्थान हासिल करनबाले टिमके नगद रु.१८ हजार अइसी करके प्रतियोगितामे तीसरो होन बारे टिमके नगद रु.९ हजार सहित ट्रफी, मेडल और प्रमाणपत्र प्रदान करइया हएँ । विजेता और उत्कृष्ट प्रदर्शन करन बाले खेलाडीन्के पुरस्कार और सम्मान प्रदान करके खेलकुद क्षेत्रमे औ जध्धा प्रोत्साहन करन आयोजककी तयारी हए ।
प्रतियोगितामे सहभागी होन इच्छुक टिमके ताहीँ दर्ता शुल्क रु.१ हजार ५ सय निर्धारण करी हएँ । प्रतियोगितामे सहभागी होन चाहन बाले भलिबल टिम तोको भओ समय भितर आवश्यक प्रक्रिया पूरा करके अपनी टिम दर्ता करनके आयोजक आग्रह करी हएँ ।
भलिबल प्रतियोगितासँग कार्यक्रममे तमान सांस्कृतिक कार्यक्रम फिर आयोजना करइया हएँ । सांस्कृतिक कार्यक्रम मार्फत स्थानीय कला, संस्कृति और प्रतिभाकी प्रदर्शन करन तयारी करोगओ करके आयोजक बताई हएँ ।
धनगढी उपमहानगरपालिका वडा नं. ७ मनेहरामे आयोजना होन वालो प्रतियोगिता स्थानीय खेलाडीनकाे अपनी प्रतिभा प्रदर्शन करनको अवसर प्रदान करनके संगए युवाके खेलकुदघेना आकर्षित करनमे महत्वपूर्ण भूमिका खेलनको अपेक्षा हए ।
प्रतियोगिताके भव्य और सभ्य रुपमे सम्पन्न करन आयोजक, टिम, खेलाडी, खेलप्रमी, स्थानीयवासी और सम्बन्धित सबए पक्षके आवश्यक सहयोग और सहभागिताके ताहीँ आग्रह करी हएँ । तीन दिनतक सञ्चालन होन बालो प्रतियोगितामे रोमाञ्चक भलिबल प्रतिस्पर्धा सँगए सांस्कृतिक कार्यक्रम फिर होनकी कारण से स्थानीय खेलप्रेमी और दर्शकनकाे जद्यासे जद्या सहभागिता होनको आयोजक आशरा करी हएँ ।
टिम दर्ता करन और प्रतियोगिता सम्बन्धी थप विस्तृत जानकारीके ताहीँ ९८००६३४२६९, ९८१(५६०३०६६ और ९८२१६०९१४५ मे सम्पर्क करसकत हओ ।
