श्री कृष्ण जन्माष्टमीको अवसरमा धनगढी-१३, श्रीलंकामा ‘स्वर्गीय सन्तराम चौधरी स्मृति नाइट पेनाल्टी शुटआउट प्रतियोगिता २०८३’ आयोजना हुने भएको छ । ‘खेलकुद र एकता, हाम्रो पहिचान’ भन्ने मूल नाराका साथ आयोजक डिजे श्रीलंकाले यो खेलकुद प्रतियोगिता सञ्चालन गर्न लागेको हो । यो प्रतियोगिता २०८३ भदौ १९ गते साँझ ७ बजेदेखि धनगढी-१३, श्रीलंकाको खेल मैदानमा आयोजना हुनेछ ।
यस प्रतियोगितामा उत्कृष्ट प्रदर्शन गर्ने विजेता टोलीहरूका लागि आकर्षक नगद पुरस्कार तथा ट्रफीको व्यवस्था गरिएको छ । प्रतियोगितामा प्रथम स्थान हासिल गर्ने टोलीले रु. २०,०००, दोस्रो हुने टोलीले रु. १०,००० र तेस्रो स्थान प्राप्त गर्ने टोलीले रु. ५,००० नगद पुरस्कार पाउनेछन् ।
प्रतियोगितामा सहभागी हुनका लागि प्रतिटिम रु. १,५०० प्रवेश शुल्क तोकिएको छ भने पुन: प्रवेशका लागि रु. ८०० लाग्नेछ । प्रत्येक टिममा ५ जना खेलाडी र १ जना गोलकिपर गरी जम्मा ६ जना (५ + १) सहभागी हुन पाउनेछन् । खेलमा कुनै उमेर समूहको सीमा राखिएको छैन, जसले गर्दा जुनसुकै उमेरका खेलाडीले प्रतिस्पर्धा गर्न सक्नेछन् । आयोजकका अनुसार अनलाइन माध्यम eSewa (किशन चौधरी: ९८६९८९२४७३) मार्फत पनि प्रवेश शुल्क भुक्तानी गरी टिम दर्ता गर्न सकिने सुविधा उपलब्ध गराइएको छ ।
प्रतियोगितालाई व्यवस्थित बनाउन आयोजकले केही कडा नियमहरू लागू गरेको छ। खेल शुरू हुनु अघि नै टिम दर्ता गरिसक्नुपर्नेछ भने एक टिमबाट खेलिसकेको खेलाडीले अर्को टिमबाट खेल्न पाउने छैनन् । खेल अवधिभर रेफ्रीको निर्णय नै अन्तिम मानिनेछ र खेल मैदान सफा राख्नुपर्नेछ । साथै खेलका क्रममा कुनै चोटपटक लागेमा खेलाडी स्वयं जिम्मेवार हुनुपर्नेछ । प्रतियोगिता सम्बन्धी थप जानकारी वा टिम दर्ताका लागि आयोजक समितिका सुरज चौधरी (९८२४९८३१४४), किशन चौधरी (९७६७२५१३८७), राजकुमार चौधरी (९७४६३३२१२२) र धनिराम चौधरी (९८६५९३७६६३) लाई सम्पर्क गर्न सकिनेछ ।
