नन्दलाल राना /उत्तर प्रदेश भारत l
उत्तराखण्ड भारत थारु क्षेत्र लखिमपुरखिरीकी दुई विद्यालय (उच्च प्राथमिक विद्यालय नझोटा गाउ और प्राथमिक विद्यालय कुतियाकबर) के विद्यार्थीनके पढाइमे सहयोगके ताँहि एक एक थान कम्प्युटर और कुछ गणितिय समाग्रि हस्तान्तरण करिहएँ ।

मनकारी विद्यालय निरिक्षक ओमकार राना द्वारा दुनु विद्यालयमे अध्ययन करनबारे विद्यार्थी तथा प्राधानाध्यापक श्री करण राना और श्री प्रभावती रानाके समाग्री हस्तान्तरण करिहएँ । हस्तान्तरण समाग्रिके प्रमुख पहुना नेपालके पुर्व वन तथा वातावरण मन्त्री माननिय नारदमुनि राना और विश्ष्टि पहुनाके आसनमे धनगढी उपमहानगर पालिकाकी उपप्रमुख कन्दकला राना रहएँ ।

समाग्री हस्तान्तरण पच्छु कार्यक्रमके समबोधन करत पुर्व मन्त्री कहि युग अनुसारको शिक्षामे जोडदेन पडो अभय प्राविधीको जमाना हए, मिर कार्यकालमे जब मय संसद रहौ तओ मय नेपालकी सुदुरपश्चिम प्रदेशकी एक सरकारी विद्यालयमे आइटी स्माटबोड सहितको शिक्षाके ताहि कार्यक्रम डारो रहौ । छोटे बच्चा कलके देशके कर्णधार हए ।

इनके बढिय शिक्षा,दिक्षा देनसे देशको भविष्य उज्वाल होबैगो बताई । जेहि विद्यार्थीन मैसे भविष्यके कोइ पुल्सिया, डाक्टर , वकिल और कोइ बडे ओहदाके व्यक्ति बनंगे । मिर समय बच्चनसे अनुरोध हए कि तुमहु पढलिखके देश और समाजके ताँहि सम्मानित व्यक्ति बनियो बताइ रहए ।
कार्यक्रममे मनकारी शिक्षा अधिकारी राना कहि मिर प्रणाके स्रोत मिर ददा ओमप्रकाश रानाकी अनुरोधमे जे दुई (उच्च प्राथमिक विद्यालय नझोटा गाउ और प्राथमिक विद्यालय कुतियाकबर) विद्यालयमे विद्यार्थीनके ताँही शैक्षिक समाग्री देन पडो कहि और मिर फिर इच्छा रहए कि मन्दिरमे दान देनसे विद्यालयमे देन वढीया रहबैगो कि ? ।

सरकारी विद्यालयमे गरिव अभिभावकके बच्चा पढत हए जौन की बे विद्यार्थी जे सब महिगी समाग्री देखन तक न पात हए । और उच्च प्राथमिक विद्यालय नझोटा गाउकी विद्यालयमे मय छोटेमे पढो रहौ औ आज जा पोष्टमे पुगो हौ । विद्यालयमे विद्यार्थीको हौसला प्रदान करन ताँहि शैक्षिक समाग्री हस्तान्तरण करो कहिके बताइ रहए ।
कार्यक्रममे गयक लक्ष्मी राना, पत्रकार नन्दलाल राना लगायत गाउके अगुवाको उपस्थित रहए ।