नन्दलाल राना /कञ्चनपुर, १ फागुन । कंचनपुरमे बेलौरी नगरपालिका थारु समुदायक आदिमकालसे चलत आइरहो बरघर, भलमन्सा परम्परागत प्रथाके मान्यता देनके ताँहि ऐन लाइहए ।
बेलौरी नगरपालिका नगर क्षेत्रमे बैठत आएरहे रानाथारु, डंगौराथारु, कठरियाथारु सबय प्रकृतिक थारु समुदायक बरघर, भलमन्सा प्रथाके कानुनी मान्यता दइहएँ । जक बारेम ऐन लाइके बेलौरी नगरपालिका कानुनी मान्यता दाइहए । शनिचरके रोज निभटो नगरपालिकाक ८औँ नगर सभासे ऐन पारित करिहएँ ।
बेलौरी नगर पालिकाक मेयर पोतिलाल चौधरी थारु समुदायक लोक संस्कृति परम्परा बचान उद्देश्यके साथ बरघर भलमन्सा परम्परा प्रथाके मान्यता देन ताँहि ऐन लाएहएँ ।
मेयर चौधरीक अनुसार परम्परागत रुपमे चलत औ मानत आओ बरघर भलमन्सा प्रथाके अबखिर कानुनी मान्यता दएगौहए । मेयर चौधरी अपन चुनावी एजेण्डा समेत होनके कारनसे फिर अबखिर ऐनके रुपमे पारित करे कहिं ।
जा ऐन संग और निरो ऐन फिर बेलौरी नगर पालिका पारित करिहए । जिल्लाक पहिलो सदरमुकाम बेलौरीक सम्बृद्धि बनानके ताँहि स्थानीय सरकारसे तमान पहल भौहए कहिके मेयर चौधरी बताई ।
थारु समुदायक लोक परम्परा और संस्कृति संरक्षणके ताँहि नगरपालिका सहित मेयर पोतिलाल चौधरी नेतृत्वक जनप्रतिनिधी लाओ ऐनमे स्थानीय थारु समुदायक बरघर,भलमनसा खुसी भएहए बटाई ।