नरेश राना,लालझाडी,२४ कातिक ।

कञ्चनपुर, लालझाडी गाउपालिका स्थित नेपाल रानाथारू समाज केन्द्रिय समितिक आयोजनामे राष्ट्रिय जनगणना सम्बन्धि सचेतिकरण अभियान कार्यक्रम निभटो । बुधकेराेज लालझाडी पालिका स्तरिय भलमन्सा , नागरीक समाज, जनप्रतिनिधि सम्मिलित सचेतिकरण अभियानकी गाेष्ट भइर हए । कार्यक्रम संस्थाके उपध्यक्ष ओमप्रकाश रानाके सभापतित्वमे निभटो । कार्यक्रमको वडे पहुना लालझाडी गाउँपालिकाके अध्यक्ष मदनसेन वडायक रहए ।

“राष्ट्रिय जनगणना २०७८ रानाथारुनके ताँहि पहिलो हए । जा जनगणनामे हमर सहभागीता हाेनपडाे बताइ , और बे सबय वडा अध्यक्षके निर्देशन फिर दइ तुम कलसे अपन अपन वडामे सहभागिताके ताँहि सुचना निकारनपडाे और हरेक दिन कार्यपालिका सदस्य पलाेपलाे करेके हाेत हए या कैसे हाेतहए जे १५ दिन जनगणनाके देवाै कहि । नेपाल सरकार पालिकाके स्थानिय सरकारकाे नाम दइ पर पुराे अधिकार अभयतक नादैहए । कुछ काम करन अग्गु बढाै कहेसे संघिय और प्रदेश कानुनसे बँझरहाे हए प्रदेश स्तरीय बहुतसे कानुन बनन अास्थामे हए जा से फिर कछु काम नहुइपाएरहाे हए । लालझाडी गाउपालिका भलमन्सानके ताँहि भलमन्सा कार्यविधि मसाैदा बनन अवस्थम हए , लालझाडी गाउपालिका भितर भलमन्साकाे संयाेजकके कार्य पालिका सदस्य बराबरकाे सेवासुविधा देन तक कार्यविधिमे उल्लेख कराे गाैहए ।

कार्यक्रमको दुसरे वडे पहुना लालझाडी गाउपालिका १, २ , ४ के वडा अध्यक्ष रहएँ । कार्यक्रममे उपस्थित लालझाडी गाउँपालिका अन्तरगतके भलमन्सा जनप्रतिनिधिनके नेपाल रानाथारु सामजके उपाध्यक्ष कमल सिंह राना प्रशिक्षण दइरहएँ । प्रशिक्षण देन क्रममे कहि रानाथारुको जातमे रानाथारु लिखान, और जातिको कोड १२६ जरुर लिखवान , पुर्खक भाषामे रानाथारु , मतृभाषामे फिर रानाथारु लिखान पडेहए बताई । प्रशिक्षर्थीनसे उठो प्रश्नके जवाफमे कहि भाषाको कोड अभे हमके नामिलो हए पर भाषाकोडके ताँहि हमर बात केन्द्रमे प्रदेश कार्यालयमे हुइगइ हए अभय भाषामे रानाथारु लिखान कोडके ठाउमे ड्यास लगान कहिके बताइ और जहु कहि गणकलोग जब फरम भरए निलो मसिभै डटपेन और सहि सत्य विवरण देन मत छुटैयो कहि उपाध्यक्ष राना ।

कार्यक्रममे विप्लस मिडियाके अध्यक्ष भानुप्रताप राना भिडियो दिखाइके जनगणनाके बारेम प्रस्टकरी रहएँ । कार्यक्रमके स्वागत मन्तव्य संस्थाके सदस्य गर्भ राना करिरहएँ और संचालन महासचिब भक्तराज राना करिरहएँ ।