धनगढी,२१ कातिक । राष्ट्रिय जनगणना २०७८ कातिक २५ से अगहन ९ गते तक होनबारो जनगणनामे रानाथारु सामुदायमे सचेतिकरण अभियानमे पुर्व मन्त्री मननिय नारदमुनि राना गाउगाउमे जाइके समझात हएँ ।

बे कहात हएँ , ‘औरनके हकमे जा १२औँ जनगणना हुइहए पर रानाथारुहरुक ताँहि जा जनगणना पहिलो दप्फेरको हए ।, २०७६ साल माघ २० गते हम सुचिकृत हुइगएहए, राज्य हमके अलगसे पहिचान दइडारी हए , अव हमर जनगणना अलगय होनपडो कहिके हम माग करे और आज बहे अनुसार हामर पहिचान रानाथारु, हामर पुर्खाको भाषा रानाथारु, हमर बोलनियँ भाषा फिर रानाथारु हए और हमर जातिको कोड १२६ हए कहिके जनतनके सचेत कराइहएँ ।,’

‘ जा के संगय माननीय राना कहि मय चुनबके दौराना जनतासे करोे बाचा पुराहूइरहो कहिके विश्वास दिलाइहएँ । हमर पहलमे रानाथारुके सुचिकृत करानमे सफल भए इतका इकल्लो ना मेरी महलमे रानाथारुक अलगसे जनगणना होनपडो कहिके पहल कारे और आज रानाथारुको अलगसे जनगणना होनजाएरहोहए । मिर सबय ददाभइया,दिदीवहिनियाँसे अनुरोधहए अपन विवरण सत्य तथ्य भरान मत छुडियो माननीय राना किहहएँ ।

बहे कार्यक्रममे नेपाल रानाथारु सामजके केन्द्रिय उपाध्यक्ष कमल सिंह राना राष्ट्रिय जनगणना २०७८को महत्व और आवश्यक्ताक बारेम प्रकाश पारीरहएँ कहेसे कार्यक्रमके विपलस मिडियाके अध्यक्ष भानुप्रताप राना सहजिकरण करिरहए । सचेतिकरण अभियानमे रानाथारु डटकमके सम्पादक नन्दलाल रानाको जनगणना सचेतिकरणन अभियानमे हमर पुर्णरुपमसे साथ और सहयोग रहबैगो कहिके बताइहएँ । सचेतिकरण अभियान कार्यक्रम धनगढी उपमहानगर पालिका वाड नं. ११ का गाउमे संचालन भौरहए । गाउके भलमन्सनको सहयोगसे भलमन्सक सभपतित्वमे कार्यक्रम निभटोरहए ।