पुनर्वास,१९ कातिक । कञ्चनपुर, पुनर्वास नगर पालिका स्थित रानाथारु उत्थान समन्वय मञ्चके आयोजनामे दिवारिक शुभकामना और राष्ट्रिय जनगणना सम्बन्धि एक दिवसिय प्रशिक्षण कार्यक्रम निभटो ।

नगर स्तरिय भलमन्सा और राष्ट्रिय जनगणनामे खटेभए गणलोगनके प्रशिक्षण देनउद्देश्यसे अायाेजना कराेगाै रहए । कार्यक्रम संस्थाके अध्यक्ष धोखे रानाके सभापतित्वमे निभटो । कार्यक्रमको वडे पहुना सुदुरपश्चिम प्रदेशके प्रदेश सभासदस्य श्यामलाल राना रहए । “राष्ट्रिय जनगणना २०७८ रानाथारुनके ताँहि पहिलो हए । अभयत तक हमर गणना थारुमे होत आओरहए , जहे साल प्रदेश सरकार कर्मचारी प्रशाशन सम्बन्धि विधे लानताहि प्रदेश सभामे टेवल भौ रहए , हुन पर सब जातजाति अरक्षण पात हए ,कहेसे हाम काहेन पामए कहिके सवाल उठो तओ हुनपर हमर जनसंख्य ना दिखानो और हम भाग पानसे छुटन लागे तओ हम बो विधेक रोकनके ताँहि प्रदेश सरकारके अनुराेध कहे हएँ । ”

कार्यक्रमको दुसरे वडे पहुना लालझाडी गाउपालिकाके अध्यक्ष मदनसेन वडायक रहएँ । जनगणना इतनो ढिगै आइगौ और जाके प्रचारप्रसार करन ताँहि गाउ-गाउमे सचेतिकरण अभियान चलाने अनुरोध करी । वेमौसमी बहियाके कारणसे सब अस्तव्यस करदइहए किसान बहुत मार्कामे पडेहए । सरकार वाढपिडितके क्षेतिपुर्ति देहौ त कहि हए पर कितनो दिनमे आबैगो पता नाहए तहु फिर हम लालझाडि लगायत पुनरवास नगर पालिका, बेलौरी नगर पालिका लगयतके पालिका मिलके सुदुरपश्चिम प्रदेशके मुख्यमन्त्रीसे मिलनके जवैया हए कहकिके जानकारी दइहए । और बे लालझाडीमे जनगणना सम्बन्धि सचेतिकरण अभियानके ताँहि लालझाडीमे रहे भलमन्सानके बैठक बुलान ताँहि पहल कदमी करंगो बताइ ।

एैसीकरके पुनर्वास नगर पालिकाके वडा अध्यक्ष सुकदेव राना राष्ट्रिय जनगणना सफल बनान ताँहि गाउगाउमे सचेतिकरण करान पडो कहि अभय फिर कछु ना विगडो हए २,४ दिनमे निभट जाबैगो बताइ ।

कार्यक्रममे उपस्थित पुनर्वास नगर पालिका अन्तरगतके बाह्रा गाउँके भलमन्सा गणकलोगनके नेपाल रानाथारु सामजके उपाध्यक्ष कमल सिंह राना प्रशिक्षण दइरहएँ । प्रशिक्षण देन क्रममे कहि रानाथारुको जातमे रानाथारु लिखान, और जातिको कोड १२६ जरुर लिखवान , पुर्खक भाषामे रानाथारु , मतृभाषामे फिर रानाथारु लिखान पडेहए बताई । प्रशिक्षर्थीनसे उठो प्रश्नके जवाफमे कहि भाषाको कोड अभे हमके नामिलो हए पर भाषाकोडके ताँहि हमर बात केन्द्रीय कार्यालयमे , प्रदेश कार्यालयमे हुइगइ हए अभय भाषामे रानाथारु लिखान कोडके ठाउमे ड्यासकाे चन्ह्र लगान कहिके बताइ और जहु कहि गणकलोग जब फरम भरए निलो मसिभै डटपेन और सहि सत्य विवरण देन मत छुटैयो कहि उपाध्यक्ष राना ।

कार्यक्रममे विप्लस मिडियाके अध्यक्ष भानुप्रताप राना भिडियो दिखाइके जनगणनाके बारेम प्रस्टकरी रहएँ । शिक्षक सेवाराम राना अनवारो जनगणनामे सबय जनिसहभागि होमए कहिके बताइ । कार्यक्रमके स्वागत मन्तव्य संस्थाके सदस्य फुल्लन राना करिरहएँ और संचालन सचिब तिर्थराज राना करिरहएँ ।अाजसे भलमन्सनके माध्यमसे हरेक गाउँमे जनगणना सचेतिकरण अभियान संचालन करन हाेनपाडाे कहिके जनकारी दए ।