धनगढी,१४ फागुन ।
उत्तर प्रदेश भारत, थारु क्षेत्र लखिमपुर खीरी निझोटा गाँवकी स्कुलमे होली पर्वके उपलक्ष्यमे अन्तराष्ट्रिय थारु होली मिलन समारोह एवं होली प्रतियोगिता हुवैया हए । थारु जन कल्याण मञ्च संस्था लखीमपुर खीरीके आयोजनामे दुई दिनको कार्यक्रम हुबैया हए कहिके संस्थाके अध्यक्ष एवं पिपरौला गांवके प्रधान छैलविहारी राना जानकारी दइहएँ ।

कार्यक्रम करनको खास उद्देश्य रानाथारुकी हारात जएरहो भाषासंस्कृति भेषभुषा संरक्षण तथा संवद्धन करन । दुधवा नेस्नलपार्कमे आन्तरीक और वहय पर्यटकनके भित्र्यान औ जाके संग संगय रानाथारु होमस्टे संचालन और रानाथारु संग्रहलयको स्थापना करन कहिके जानकारी दईहएँ ।

अन्य जाति समुदायके अपन रहन सहन बाेलीभाषाक पहिचान करान , जब हम अपनी पहिचानय मिटाएडारे कहेसे कलके दिन हमर अस्तित्व रहवैगाे कि नाए ?  तहिक मारे अपन पहिचान दिखानके ताँहि जा समारोहको आयोजना होनडटो हए कहिके प्रधान संघके अध्यक्ष रामनरेश राना बताई हएँ ।

कार्यक्रम जहे २०२३।०३।११,१२ तारिख ( २०७९ फागुन २७,२८गते ) होली प्रतियोगितामे सहभागि टिम २०२३।०३।०९ तारिख ( २०७९ फागुन २५ गते ) भितर अपन होरी टिम इन्ट्री कराडारन पडो , होरी इन्ट्रीके ताँहि संस्कृतिक संयोजक ओमप्रकाश राना निझोटामे सम्पर्ककरन बताइहए ।

होली प्रतियोगितामे प्रथम,दिृतिय औ तृतिय होन बारेनके नगद पुरुषकार क्रमशः रु १५०००,१००००, ५००० । सहभागि सबय टिमके फगुहा तथा प्रमाण पत्रसे सम्मान करोजाबैगोे बताइहए आयोजक । जाके संगय विच विचमे लोक गितकी प्रस्तुति फिर होवैगो जनाइहए ।