टीकापुर घटनाके राजनीतिक रुपमे समाधान करन पडो

२६ कार्तिक २०७७, बुधबार
टीकापुर घटनाके राजनीतिक रुपमे समाधान करन पडो

धनगढी,२६ कार्तिक ।
नेपाली काँग्रेस कैलालीक सभापति नरनारायण शाह ‘मनु’ कहि टीकापुर घटना राजनीतिक घटना हए राजनीतिक रुपसे समाधान करन पडैगो बताइहएँ ।
थरुहटरथारुवान मोर्चाको तीन बुँदाको मागसहित ज्ञापनपत्र लेत सभापति शाह कहि २०७२ भादौ ७ गते कैलालीक टीकापुरमे भओ घटनाके राजनीतिक रुपसे सुल्झान पडैगो कहिके जोड दइहएँ । सभापति शाहकहि , ‘नेपाली काँग्रेस २०७३ सालमे जिल्ला कमिटिक बैठक बैठके टीकापुर घटना राजनीतिक घटना होनसे राजनीतिक रुपमे सुल्झान पडैगो कहिके निर्णय करिरहए औ जक ताँहि पहल फिर भओ रहए ।’


भदौ ८ गते टीकापुरमे भओ थारुवनको घर, पसल, व्यापार, एफएममे भओ आगजानीक क्षति पुर्तिक ताँहि पहल फिर करे सभापति शाह बताइ हएँ । गओ बर्षमे टीकापुरमे मोर्चासे आयोजीत कार्यक्रममे पार्टीक झबही बैठकमे पानीक व्यवस्थापन करन निर्णय करोगओ रहए कहिके बताइ । टीकापुर घटनाके हल्दि किनारा लगानपडो पार्टीक धारणा हए बताइ पूर्व सांसद कृष्णकुमार चौधरी । नेपाली काँग्रेस उद्धारबादी औ थारु समुदायप्रति जिम्मेवार हए कहेसे हमर माग मुद्दाके गम्भीर रुपमे लैदेनके ताँहि आग्रह करतहएँ । मोर्चाके कैलाली संयोजक माधव चौधरीे सभापति शाहके तीन बुँदाको मागसहित ज्ञापनपत्र बुझाइरहएँ ।


ज्ञापनपत्रमे नयाँ संविधानमे हमर पहिचान औ अधिकार सुनिश्चितता करन क्रममे २०७२ भादौ ७ गते टीकापुरमे भओ राजनीतिक दलको आधिककारिक धारणा का हए ? जा सम्बन्धमे मोर्चा औ आम कैलालीबासीनके स्पष्ट करनपडो बताइ , पहिचान औ अधिकारके ताँहि भओ आन्दोलनके क्रममे टीकापुर घटनाके राजनीतिक रुपसे समाधान करन राजनीतिक दलमे पहलकदमीक बारेम जनतनके जानकारी करानहए , २०७२ साल भादौ ८ गतेक दिन सम्प्रादायिक दंगा निम्तन हिसाबसे थारुवनके घर, पसल, व्यापार, एफएममे आगजानी तथा लुटपाट करनबालेनके नाममे किटानी जाहेरी होतसोतमे फिर अपराधिनके प्रहरी प्रशासन घटना भओ ५ वर्ष बितगौ हए तहु कानूनी दायरामे नलाइहए औ पक्रडनके ताँहि मुद्दा फिर नचलानसे हम हिनाकि पार्टीबालेनसे अधिकारिक धारणा जनतनके आग्गु स्पष्ट रुपमे लानहए बताइ ।
मोर्चा बुधबार नेपाली काँग्रेस, नेकपा, जसपा, साझा पाटी, राष्ट्रिय जनमोर्चा, राप्रपा, नेपाल लोकतान्त्रिक पार्टीलगायत राजनीतिकदलके तीन बुँदे मागसहित ज्ञापनपत्र दइहए औ राष्ट्रिय मानव अधिककार आयोग क्षेत्रीय कार्यालय धनगढीमे बोधार्थ पठामंगे संयोजक माधव चौधरी जानकारी दइहएँ ।

Wedding Story advertisement Of Jems Movies & Photo Studio