नरेश राना। / लालझाडी
कञ्चनपुरको लालझाडी गाउँपालिका–२, कञ्जस्थित श्री भानु माध्यमिक विद्यालयमा आयोजित बृहत् अभिभावक भेलाबाट विद्यालय व्यवस्थापन समितिको नयाँ नेतृत्व सर्वसम्मत रूपमा चयन गरिएको छ। भेलाले विद्यालय व्यवस्थापन समितिको अध्यक्षमा नरेश रानालाई चयन गरेको छ भने सदस्यहरूमा नन्दलाल राना, प्रमिला राना र सीता राना सर्वसम्मत रूपमा चयन भएका छन्।
विद्यालय परिसरमा सम्पन्न भेलामा अभिभावकहरूको उल्लेखनीय सहभागिता रहेको थियो। कार्यक्रममा विद्यालयको शैक्षिक गुणस्तर अभिवृद्धि, भौतिक पूर्वाधार विकास, विद्यार्थीको सिकाइ उपलब्धि सुधार तथा विद्यालय र अभिभावकबीचको समन्वयलाई थप प्रभावकारी बनाउने विषयमा व्यापक छलफल गरिएको थियो।
भेलामा बोल्दै नवनिर्वाचित अध्यक्ष नरेश रानाले आफूलाई दिएको जिम्मेवारीलाई इमानदारीपूर्वक निर्वाह गर्दै विद्यालयको समग्र विकासका लागि सबै पक्षसँग सहकार्य गरेर अगाडि बढ्ने प्रतिबद्धता व्यक्त गरे। उनले विद्यालयलाई गुणस्तरीय शिक्षाको केन्द्रका रूपमा स्थापित गर्न अभिभावक, शिक्षक, विद्यार्थी तथा स्थानीय तहबीचको सहकार्य अपरिहार्य रहेको बताए।
कार्यक्रममा निवर्तमान विद्यालय व्यवस्थापन समिति अध्यक्ष प्रकाश रानाले आफ्नो कार्यकालमा साथ र सहयोग गर्ने सम्पूर्ण अभिभावक, शिक्षक तथा सरोकारवालाप्रति आभार व्यक्त गर्दै नयाँ समितिलाई सफल कार्यकालको शुभकामना दिएका थिए। उनले विद्यालयको विकासका लागि निरन्तर सहयोग र समन्वय आवश्यक रहेको धारणा राखे।
त्यसैगरी लालझाडी गाउँपालिका–२ का वडाध्यक्ष आशाराम रानाले विद्यालयको शैक्षिक तथा भौतिक विकासमा वडा कार्यालयको आवश्यक सहयोग रहने प्रतिबद्धता व्यक्त गरे। उनले सामुदायिक विद्यालयको गुणस्तर सुधारमा अभिभावक र स्थानीय समुदायको सक्रिय सहभागिता महत्त्वपूर्ण हुने बताए।
भेलामा जनप्रतिनिधिहरू, विद्यालयका प्रधानाध्यापक वेद प्रकाश उपाध्याय, शिक्षक–शिक्षिका, अभिभावक तथा स्थानीय बुद्धिजीवीहरूको उपस्थिति रहेको थियो। सहभागीहरूले विद्यालयको समग्र विकासका लागि नवगठित समितिले प्रभावकारी भूमिका निर्वाह गर्ने विश्वास व्यक्त गरेका थिए।
कार्यक्रमको अन्त्यमा विद्यालय प्रशासनले नयाँ नेतृत्वलाई बधाई तथा सफल कार्यकालको शुभकामना व्यक्त गर्दै विद्यालयको शैक्षिक उन्नयनका लागि सबै पक्षबाट निरन्तर सहयोगको अपेक्षा गरेको थियो।
