दिनेश राना/कैलाली: नेपाल रानाथारु समाजकी पत्रकार सम्मेलन निभटो हाए । पत्रकार सम्मेलनकी सभाध्यक्षता नेपाल रानाथारु समाजकी अध्यक्ष कृपाराम राना करी रहएँ । उक्त कार्यक्रममे नेपाल रानाथारु समाजके उपाध्यक्ष कमल सिं राना, नेपाल रानाथारु समाजके महासचिव भक्तराज राना, धनगढी उपमहानगरपालिकाकी उपमेयर तथा नेपाल रानाथारु समाजकी कोषाध्यक्ष कन्दकला राना एवंम तमान् बुद्धिजिवि तथा मेडियान्को उपस्थिति रहए ।
आजकी पत्रकार सम्मेलनमे नेपाल रानाथारु समाजके अध्यक्ष कृपाराम राना, नेपाल रानाथारु समाजको सातौँ महाधिवेशनकी बारेम प्रकाश पारी रहएँ । साथै बे बिनकी कार्यकालमे भए कुछ फलदायी कार्यन्मे फिर प्रकाश पारी रहएँ । बे कहि रहएँ, क्वाँर २४ गते नेपाल रानाथारु समाजको महाधिवेशन जहे धनगढी उपमहानगरपालिकाकी सौराई बेन्कुइट्स, धनगढीमे एक ऐतिहासिक रुपमे हुइहए ।
जा कार्यक्रमके ताहिँ सबए कैलाली औ कञ्चनपुरके प्रतिनिधिको छनौट प्रक्रिया लगभग अन्तिम चरनमे हए । नेपाल रानाथारु समाजके अजीवन सदस्य और गाउँके ३ जनि प्रतिनिधिके हिसाबसे जा महाधिवेशनमे सहभागिता जनाए सकत हएँ । सातौँ महाधिवेशन रानाथारु जो कैलाली और कञ्चनपुरमे रहे प्रमुख आदिवासी भुमिपुत्रके ताहिँ एकदमए महत्वपूर्ण रुपमे लए हएँ । जा महाधिवेशनमे नेपाल रानाथारु समाज आजतक का करि बे उपलब्धि सर्वजनिक करहएँ । और जा महाधिवेशनमे अग्गु बढन बखत सबएन्को सहमति मर्फत अग्गु बढ्हएँ, बाके ताहिँ कैलाली और कञ्चनपुरमे रानाथारुको कमिटि हए । हम एकताबद्ध रुपमे अग्गु बढ्हएँ । जा महाधिवेशन हमरो सर्वसम्मतको महाधिवेशन हुइहए । राज्यमे थप अधिकारको सुनिश्चित्ता करान ताहिँ भि जा महाधिवेशन महत्वपुर्ण हुइहए । नेपाल रानाथारुको जा सातौँ महाअधिवेशन नयाँ नेतृत्व चयन करन ताहिँ एक ऐतिहासिक, महत्वपुर्ण और फलदायी हुइहए ।
झन्डै ६०० सम्म जनप्रतिनिधिन्को सहभागिता हुइहए पर सबए गाउँसे समुद्घाटन सत्र मे ८०० से जधाको भेला हुइसकत हए ।
ऐसी करके हमर कार्यक्रममे प्रमुख अतिथि पुर्व वन तथा वातावरण मन्त्रि नारदमुनि राना हुइहएँ, विशिष्टि अतिथिमे संविधान सभा सदस्य, प्रदेश सभा सदस्य, पालिका अध्यक्ष, उपाध्यक्ष और मित्र राष्ट्र भारतसे फिर पहुनान्के आमान्त्रित करो गओ हए । तभिकमारे कैलाली, कञ्चनपुर इकल्लो नाए जाको प्रभाव मित्र देश भारतमे भि होन कारनसे जा एक सन्देशमुलक महाधिवेशन भि रहइगो ।
जा महाअधिवेशनमे अब रानाथारुके कैसे करके अग्गु बढामए जाको खाका भि तयार करो जबाइगो । रानाथारु सूदुरपुश्चिम प्रदेश नीजामति ऐन २०७९ मे रानाथारुके आरक्षणको ग्यारेण्टी भओ पर न्यायिक नाए भओ । जाके हम न्यायिक बनान ताहिँ एक सुझाव समिति भि बनाए हएँ जो मे नेपाल रानाथारु समाजके तमान पदाधिकारी भि हएँ ।
अन्तमे रानाथारु एक सरल, विशुद्ध और शान्ति प्रेमी जाति होनको कारन सातौँ महाधिवेशन भि शान्तिपुर्ण हुइहए आशा करे हएँ । और बन्दसत्रमे जो हुइहए बहे रानाथारु समाजके ताहिँ सर्वमान्य हुइहए करके अह्वान करत हएँ ।
जासे पहिले अभेतक निर्वाचन ना भओ रहए आनिया दिनमे भि निर्वाचन ना हुइके आपसी सहमतिमे नयाँ नेतृत्व चुनो जाइगो करके आशा लेतए बे अपनी बात खतम करि रहएँ ।
