नन्दलाल राना, संपदक। लखिमपुर खिरी ।
थारु जन कल्याण संस्था लखिमपुर खीरीके नव निर्वाचित पदाध्यकारीक सपथग्रहण कार्यक्रम सम्पन्न भओ हए । कार्यक्रम संस्थाके अध्यक्ष छैलविहारी रानाके सभापतित्व मे भओ रहए ।
“लखिमपुर खिरी अन्तर्गत थारु क्षेत्रमे विद्यार्थीन के पढन ताँहि सरकारी स्तरमे बढीया स्कुल, कलेजके न हए जक ताँहि हम दिल्ली और लखनौ तक पैरवी करंगे , हिन पर विद्यालय, कलेज और लौडियनके ताँहि अलग से कलेजकी व्यवस्था करवान ताँही हम पैरवी करंगे”, मुल आदिवासी जनजाति कल्याण संस्थाके राष्ट्रिय अध्यक्ष विजय बहादुर चौधरी कहिँ ।
बे सपथग्रहण कार्यक्रम के बडो पहुना रहएँ । औ बे कहि वन अधिकारके बातमे एक दप्फेर सव जनिकी बैठक बुलाइ जए सबकी सरसल्लह अनुसार मो से होनबालो सहयोग करन मय तयार हौ ।,“ अबखिर हमरे क्षेत्रमे दुई सय भारतीय दरोगाकी सिटमे जम्मा २६ जनी इकल्लो दरोगा भए इतनो वडो जिला मे २६ जनी मे सन्तोष हुइगए हम । अब कुछ दिनमे पुलिसके ताँहि बाह्रा सौ चार सिट खुलरहि हए, डिजीपी औ सचिब भारतिय एवं ट्रोनक बोर्डके के अधिकारीमे अभए से हम निवेदन दैदए हए भरती फिकेसनके ताँहि जाँच सत्यापन करके इनकी परीक्षा और नियुक्ति करोजाए नत हमर विरोध रहवैगो कहिके बताई हए राष्ट्रिय अध्यक्ष चौधरी ।
कार्यक्रमके विशिष्ट अतिथी थारु जन कल्याण संस्था लखिमपुर खीरीके संयोजक रामनरेश राना कहि हमरे क्षेत्र से जितके गए विधायक निर्वाचन भौ तिन वर्ष हुइगाै हए जितके अभय तक मुह तक नदिखाइ हए तओ हमर क्षेत्रको विकास कैसे होवैगो तहिक मारे मय कहत हौ अब हमके ऐसो आदमीक जिताएके पठान पडो ताहि जा क्षेत्रकी विकास करए वो ऐसो आदमिक जिताएके पठामए कहि ।
ऐसि करके नव निर्वचित वरिष्ट उपाध्यक्ष ओमप्रकाश राना कहि हमारे थारु क्षेत्रमे कोइ विकास नाए भौ हए वच्चनके पढान ताँहि वढीया विद्यालय, कलेज हमारे क्षेत्रमे न हए हमारे हिनके बच्चा पढन ताँहि दुर दुर जान पडत हए , हमरे थारु क्षेत्रमे कम्ति मे सवा लाखकी अवादि हए , हिन पर एक महा विद्यालय, इन्टर कलेज और लौडियनके ताँहि अलगसे कलेज की व्यवस्था होए तव हमरे बच्चा वढीयासे पढनपामंगे और शिक्षाको विकास होबैगो बताइ ।
ऐसि करके कार्यक्रम मे थारु जन जागृति सेवा संस्थान महराजगंजके अध्यक्ष राकेश चौधरी, महामंत्री श्री राम भरत चौधरी, नव निर्वाचित वरिष्ट प्रवक्ता जगत राना , नेपाल से रानाथारु डटकमके संपादक नन्दलाल राना शुभकामना दइ रहए ।
सपथग्रहण कार्यक्रममे गावके उपस्थित प्रधानन के सम्मान करिरहए । थारु जन कल्याण संस्था लखिमपुर खीरीके नव निर्वाचित पदाध्यकारीन के मुल आदिवासी जनजाति कल्याण संस्थाके राष्ट्रिय अध्यक्ष विजय बहादुर चौधरी सपथ ग्रहण करवाइ रहए । सपथ ग्रहण लेनवारे नव निर्वाचित पदाध्यकारी अध्यक्ष छैलविहारी राण, वरिष्ठ उपाध्यक्ष ओमप्रकाश राना, उपाध्यक्ष शेर सिंह राण औ राम सहाय राणा,
महामंत्री राम चन्द्र राणा, संयुक्त मंत्री मंगल सिंह, वरिष्ठ संगठन मंत्री लक्ष्मण प्रसाद राणा, संगठन मंत्री राम कुमार राण औ राम बहादुर राणा, कोषध्यक्ष मनोज कुमार राणा, सहायक कोषाध्यक्ष बम्हन लाल राणा, संप्रेक्षक पुत्तु सिंह राणा,औ केवल राणा, वरिष्ठ संस्कृतिक मंत्री दिनेश कुमार राणा,औ राम निवास राणा, बरिष्ठ सलाहकार लीला देवी राणा,शिव चरन राणा, वरिष्ठ प्रवक्ता जगत सिंह राणा, प्रवक्ता शिव राम राणा, रामसमुझ राणा, मिडिया प्रभारी अभर सिंह राणा, प्रेम किशोर राणा, प्रचार मंत्री जयबहादुर राणा, राममिलन राना सपथग्रहण लइरहए ।
