निबा राना/धनगढी, ५ सामन । कैलालीक धनगढी उप- महानगरपलिका वडा नं ७ मनेहरा गावँमे आज सामनकाे डाेला उद्घाटन भओ हए ।

रानाथारू समुदायकी महिला दिदीबहिनीके विशेष तिउहार तिजकी उपलक्ष्यमे सामनकाे डाेलक उद्घाटन धनगढी उपमहा नगरपलिका वडा नं. ७ के वडा अध्यक्ष माेती राना करिहए। बे कार्यक्रमके प्रमुख अर्थिती रहए। कार्यक्रममे शुभकामना देत कहि संस्कृति संरक्षण और संबद्धन करन ताँहि टाेल विकास समिति गठन करके वडामे दत्ता करनेसे हरेक वर्ष वडा कार्यलयसे बजेट बिनियाेजन करन साहज हुइ हए करके बताइ हए। हरेक जातजातिनकाे संस्कृतिक संरक्षण करन ताँही बजेट विनियाेजन हुइगओ हए कहिके बातइ वडा अध्यक्ष राना।

ऐसी करके कार्यक्रमके विशिष्ट अतिथी वडा सदस्य बासु रानाथारू रहएँ औ कार्यक्रममे शुभकामना मन्तव्य नेकपा एमाले वडा सचिव प्रितम जाेशी, गाँवके भलमन्स चमरू रानाथारू, रामकुमार राना दैइ रहएँ। कार्यक्रम मथुरा रानाक सभापतित्वमे भओ रहए कहेसे स्वगत मन्तव्य इन्द्रा राना करिरहए। कार्यक्रमके सन्चालन सेवाराम राना करिरहए। सामन डाेलाकाे उद्घाटनमे आइभाइ दिदीबहिनीयँ सामन डालाकी गीत गएके मनाेरञ्जन करि रहएँ।

रानाथारू समुदायमे तिज पर्व सामनकी अँधियरिसे सुरू हुइके सामनकी उजियरिक तृतिय तिथीक दिन सामनकाे डाेलक समापन करत हएँ। तिजके अन्तिम दिन महिला दिदीबहिनीय निरहार ब्रत बैठके अपन भाइयाभतिजाेक लम्वि उमरकी कामना करत हएँ। और गडराैधामे ब्याहि महिला सत गाठी औ विन ब्याहि लाैडीया पाँच गाँठी बाधके सिमही,पुरी धारके पाेहात हए और काहत हएँ लेरि झुड्की मता जाइसि जाइसि तिर धार बढाए उइसि मिर भाइयाभातिजाेक उमर बढाए करके बर मगत हए। और अपन घरमे पकाेभओ पक्वन खाएके ब्रत खाेलत हए । तिज पर्वमे सिमही,पुरी,गुलगुला,पपरा औ पकाैडी पकात हए।