धनगढी, २० सामन ।। आगामी अगहन ४ मे होनबारो चुनावके ताहीँ निर्वाचन आयोग बहुत जल्दी राजनितिक दल दर्ता प्रकृया शुरु करैया हय । और मतदाता नामावली सङ्कलन आजसे रोक दई हय ।

सरकार प्रतिनिधि सभा और प्रदेश सभाकी निर्वाचन घोषणा करि सँगय आयोग मतदाता नामावली सङ्कलन आजसे रोक दई हय कहिके आयोग प्रवक्ता शालिग्राम शर्मा पौडेल बताई हयँ । बिष्पतके बैठी मन्त्री परिषदकी बैठक आगामी अगहन ४ गते प्रतिनिधि सभा और प्रदेश सभाकी निर्वाचन करन निर्णय करि रहय ।

जिल्ला निर्वाचन कार्यालय, जिल्ला प्रशासन कार्यालय और ईलाका प्रशासन कार्यालयमे मतदाता नामावली सङ्कलन निर्वाचन आयोग करत आओ रअय । अनलाईनसे फारम भरे भय मतदाता शनिचरबार तक उँगठा छाप और फोटो खिचवानको व्यवस्था निर्वाचन आयोग करि हय ।

आयोगकी अनुसार स्थानीय तहको निर्वाचनमे एक करोड ७७ लाख मतदाता रहयँ पर प्रतिनिधि सभा और प्रदेश सभाकी निर्वाचनमे १० लाख मतदाता बढगए हयँ । जहे सँगय आगामी निर्वाचनके ताहीँ राजनितिक दल दर्ता प्रकृया शुरु होनबारो हय, आयोग प्रवक्ता पौडेल बताई हयँ ।