निबा राना/धनगढी, ८ सामन । धनगढीमे डुबान क्षेत्र औ अतिक्रमित खाेलानाला हाटनकाे अभियान सुरू करेहएँ । जा बात धनगढी उपमहा नगरपालिकाकी उप प्रमुख कन्दकला राना सामनकाे डाेला उद्घाटन करनपेति कहिरह्एँ।

सामन १५ गते रानाथारू समुदायक तिजके उपलक्ष्यमे सामनकाे डाेला उद्घाटन कार्यक्रम महिला समुह, धनगढी-८ आयाेजना करिरहए। कार्यक्रमकी प्रमुख अतिथी उपप्रमुख कन्दकला राना रहएँ, औ बे कहि सेती प्रदेशिक अस्पातलमे बिमारी चेकजाँच करन ताँहि अल्ट्रा सावड, भिडियाे एक्सरे, रगत चेकजाँच करानीय मेशिन खरिदे हएँ औ गरिबनके निशुल्क औषधि उपचारकाे व्यवस्था करेहए। छुट्टा गाइयाँबरधानके व्यवस्थित करन ताँहि बजेट विनियाेजन करेहए, औ रानाथारूनके इक्लाे नाए सबय पिछडे जाति समुदायके संस्कृतिक संरक्षण करन धनगढी उपमहा नगरपलिकासे सहयाेग रहबैगाे करके बाचा करिहएँ ।

अइसि करके कार्यक्रममे शुभकामना मन्तव्य धनगढी उपमहा नगरपलिका वडा नं. ८ के वडा अध्यक्ष जुगराम चाैधरी, पुर्व वडा अध्यक्ष लालमनि राना, सदस्य राम स्वरूप राना, जेष्ट नागरिक फुलचन्द राना दैइ रहएँ। कार्यक्रम संस्थाकी अध्यक्ष निरासाे देवी रानाके सभापतित्वमे भओ कार्यक्रमके स्वगत मन्तव्य भलमन्सा भज्जी राना करिरहएँ, और कार्यक्रमके संचालन शिवराज राना करिरहएँ।

कार्यक्रममे दिदीबहिनियाँ लाेक गीत गएके मनाेरञ्जन कररहएँ।