निबा राना/धनगढी, ७ सामन । कृष्णपुर नगरपलिका वडा नं.९ पंचढकी गाँवमे हर्सउलासके साथ सामनकाे डाेलक उद्घाटन भओ हए।

सामनक डाेलाक उद्घाटन कृष्णपुर नगरपलिकाके नगर प्रमुख हेमराज ओझा औ उप प्रमुख द्राेपति राना मिलके करि रहए। कृष्णपुर नगरपलिकाके प्रमुख ओझा काहिं ”रानाथारू समुदाय हिनपर्न पहिलेसे बासाेबास करत अओ हए ताँहिके मारे रानाथारू समुदायकी सबैय संस्कृतिक संरक्षण करनके ताँही हमर नगरपलिकासे सब सहयाेग मिलहए करके आस्वासन दैइ हएँ”। बे कार्यक्रमके प्रमुख अथिति रहए ।

अइसि करके कार्यक्रमकी विशिष्ट अतिथी कृष्णपुर नगरपलिकाकी उप प्रमुख राना तिजकी शुभकामना देत कही संस्कृतिक संरक्षण, सम्बद्धन करनके ताँही घांघरिया औ अँगीयक कटाइ सिलाइक तलिमकी याेजना बनाए हए और रानाथारू समुदायमे उद्घाेषककी कमी हाेनकी कारणसे जाकि ताँही जलदीय तलिमा देनकाे याेजना बनाए हए कहिके बताइ राना।

औ अइसि करके कार्यक्रमके अतिथी कृष्णपुर नगरपलिका वडा नं. ९ के वडा अध्यक्ष कैलाश बहादुर बलयर, वडा नं. ८ के वडा अध्यक्ष दिनेश खड्का, जानकी समुदायक वन उपभाेक्ता समितिके अध्यक्ष चन्द्र प्रसाद भट्ट, कृष्णपुर नगरपलिका वडा नं.९के वडा सदस्य हिराप्रसाद राना, गाँवक भलमन्सा, बुद्धिजिवि, समाजसेवी तथा गाँवके महिला दिदीबहीनीयाँनकाे उपस्थिती रहए ।

कार्यक्रम भलमन्सा लालमन रानाके सभापतित्वमे भाओ कार्यक्रमके संचालन लक्ष्मी राना करिरहएँ।

अइसि करके कृष्णपुर नगरपलिकाके नगर प्रमुख हेमराज ओझा और उप प्रमुख द्राेपती राना वडा नं. ७ कलुवापुर गाँवकी सिरे पट्टि और अगली पट्टी मे सामनकी डाेलक उद्घाटन करि हएँ।

रानाथारू समुदायमे तिज पर्व सामनकी अँधियरिसे सुरू हुइके सामनकी उजियरिक तृतिय तिथीक दिन सामनकाे डाेलक समापन करत हएँ। तिजके अन्तिम दिन महिला दिदीबहिनीय निरहार ब्रत बैठके अपन भाइयाभतिजाेक लम्वि उमरकी कामना करत हएँ। और गडराैधामे ब्याहि महिला सत गाठी औ विन ब्याहि लाैडीया पाँच गाँठी बाधके सिमही,पुरी धारके पाेहात हए और काहत हएँ लेरि झुड्की मता जाइसि जाइसि तिर धार बढाए उइसि मिर भाइयाभातिजाेक उमर बढाए करके बर मगत हए। और अपन घरमे पकाेभओ पक्वन खाएके ब्रत खाेलत हए । तिज पर्वमे सिमही,पुरी,गुलगुला,पपरा औ पकाैडी पकात हए।