कञ्चनपुर १७ पुस । छैटौँ थारु राष्ट्रिय साहित्य सम्मेलन कृष्णपुर नगरपालिका–६ सिंहपुरमे आयोजना हुबैया हए । आनवारो फागुनके १२, १३ और १४ गते साहित्य सम्मेलन आयोजना होन जाएरहोहए ।

सम्मेलन आयोजना करनकी जिम्मेवारी समाजसेवी जोगराज चौधरीके दइ गइ हए । उनकी संयोजकत्वमे जिल्लाक नौवऊ स्थानीय तह सिमटन हिसाबसे १३ सदस्यीय मूल आयोजक समिटि गठन करिहएँ । समितिमे सुनिता चौधरी, दुर्गा चौधरी, सुमन चौधरी, लक्ष्मी चौधरी, खुसीराम चौधरी, हवल्दार चौधरी, जीत बहादुर चौधरी और मेवाराम चौधरी सदस्यक रूपमे हँए ।

सम्मेलन सम्पन्न करन ताँहि थारु कल्याणकारी सभा कञ्चनपुर, स्थानीय आयोजक तथा थारु लेखक सङ्घकी आन्तरिक सहमतिक आधार तय करंगे कहिके सङ्घके केन्द्रीय सदस्य मोहनप्रसाद चौधरी बताइहएँ । जिल्लाके साहित्यिक मुद्दा उठानके ताँहि बीरबहादुर राजवंशीक संयोजकत्वमे पाँच सदस्यीय समिति फिर गठन करिहएँ ।

थारु साहित्य सम्मेलनमे थारु समुदायके साहित्यिक कृति और लुकीभइ संस्कृतिक बारेम गहन छलफल तथा विश्लेषणको काम होवैगो । सम्मेलनके ताँहि लगभग रु १० लाख तक खर्च लागनकी बातभइ हए । सम्मेलनमे देशभरिके थारु साहित्यकार, बुद्धिजीवी, लेखकलोगनको जमघट होवैगो जानकारी दइहएँ ।