धनगढी,२ चैत ।
कैलालीक कैलारी गाउपालिका नौ गदरेहा गावमे होरी मिलन कार्यक्रम निभटो । विस्पतरोज गदरेहा गावक पधना धनवहादुर रानाक सभापतित्वमे कार्यक्रम निभटो ।

कार्यक्रमकी प्रमुख अतिथी नेपाली काँग्रेसकी केन्द्रिय सदस्य जीवन राना रहएँ । बे कही हमर पहिराओ पैँधके इकल्लो संस्कृति नबचैगो पर पहिलो जरुरीहए अपन पहिरन पैधन तओ फिर सरकारसे अपन अधिकार माँगन । सरकार हमे आदिवासीमे सुचिकृत करदइ पर सरकार हमे अधिकार नादइ हए थप अधिकारके ताँहि हमके एकजुट हुइके लागन पडो कहिके बताइहएँ ।

कार्यक्रमके विश्ष्टि अतिथी कैलारी गाउपालिकाके अध्यक्ष राजसमझ चौधरी रहएँ । संस्कृति युवा पुस्तामे हस्तान्तरण करन अभयको आवश्यक्ता हए बताइ रहए औ कहि जक ताँहि सबय जनी फुटके नए कि एक जुटहुइके लागन बताइ हएँ । आनबालो दिनमे एकय ठाउमे पालिका स्तरिय बडो कार्यक्रम करन बताइहए अध्यक्ष चौधरी ।

अइसी करके गाउपालिका उपाध्यक्ष भगवती कुमारी चौधरी, वडा नं. ४ के वडा अध्यक्ष ठागुराम चौधरी, धनगढी १९ के वडा अध्यक्ष बाँधुराम चौधरी शुभकामना दइरहएँ । कार्यक्रममे स्वागत मन्तव्य रामचन्द्र राना करिरहएँ कहेसे संचालन शिक्षक तथा लेखक लक्ष्मी राना करीरहएँ ।कार्यक्रममे तमान हाेरी खेली रहएँ ।