दिनेश राना, धनगढी,२८ फागुन ।
थारु जन कल्याण संस्था लखीमपुर खीरी द्वारा आयोजित अन्तराष्ट्रिय होरी मिलन एव होरी नृत्य प्रतियोगिता आज भब्यरुपसे सम्पन्न भओहए । दुई दिन तक संचालन कार्यक्रम संगठन मंत्री लक्ष्मण प्रसाद रानाके सभापतित्वमे भओ रहए ।
कार्यक्रमके मुख्य अतिथि माननिय न्यायमुर्ति वीरेन्द्र सिंह यादव रहए और विश्ष्टि अतिथिमे डा.रंगाराजू टी.,विजय बहादुर चौधरी रहए । अतिथिमे नेपालसे पुनर्वास नगर पालिकाकी नगर उपप्रमुख भुलिया राना, कृष्णपुर नगर पालिकाकी उपप्रमुख द्रोपति राना, लालझाडी गाउपालिकाके अध्यक्ष निर्मल राना, आदिवासी जनजाति महासंघ कञ्चनपुरके जिल्ला अध्यक्ष धोखे राना, लगायत गाउके भलमन्सा कार्यक्रमको शुभकामना दइरहएँ । होरी प्रतियोगित कार्यक्रम दुई दिन संचालन भओ ।
नेपाल और भारतसे १२ टिम सहभागिता जनाइरहएँ । उनमैसे प्रथम विजेता भारत उत्तराखण्ड खटिमासे बन्टी रानाकी होरी भइहए दृतिय स्थान उत्तरप्रदेश लखिमपुर खिरी पर्सिया गावकी टिम और तृतिय स्थानमे उत्तरप्रदेश लखिमपुर खिरी पचपेडा गावकी होरी भइहएँ । उनके नगद रु १५ हजार , १० हजार और ५ हजार पुरुषकार और प्रमाणपत्रसे सम्मान करोगओ हए । सहभागि सवय टिमके फगुहा दइके सम्मान करीहएँ ।
