निवा राना/ धनगढी १ सामन २०७९ । धनगढी उपमहनगर पालिका वडा नं. ७ मनेहरा गावकी महिलाके अयोजनामे आशा रानाकी सभापतित्वमे सामनको डोलाक उदघाटन कार्यक्रम सम्पन्न भौहए ।

रानाथारु सामुदायको दुसरो वडो तिउहार तिज पर्व के उपलक्ष्यमे सामनको डोलक धनगढी उपमहानगर पालिकाकी उपप्रमुख कन्दकला राना एक कार्यक्रमके विच उदघाटन करीहएँ । बे कार्यक्रमकी प्रमुख अतिथी रहए । डोलक उदघाटन करतय कहि नगर उपप्रमुख राना रानाथारुको तिज पर्व दुसरो बडो तिउहार हए । जापर्वमे हमर दिदीवहिनिया भगवानसे अपन भइया भतिजोक लम्बि उपरको कामना करत हए बताई राना । रानाथारुक ऐसे बहुतसे तिउहार हए उनको उजागर अभय फिर नाहुइपएरहो हए । अब बे सब तिउहारके उजागर करन उनके संरक्षण संबद्धन करन बहुत जरुरी हए । हमर धनगढी उपमहानगर पालिका सबय जातजातिको तिउहारके संरक्षण करन ताँहि रकम फिर विनियोजन करिहए कहिके बताई हए उपप्रमुख राना ।

कार्यक्रमके विशिष्ट अतिथी नेपाल रानाथारु समाजके केन्द्रिय उपाध्यक्ष कमल सिंह राना रहएँ । बे रानाथारु सामुदायके दुसरो बडोतिउहार तिजके उपलक्ष्यमे सबय दिदीबहिनियके हार्दिक शुभकामना दईरहएँ । नेपाल रानाथारु समाजके अगुवाइमे तिज प्रतियोगिता टाइपको कार्यक्रम करन सोच हुइरहो हए कहिके बताई हएँ उपध्यक्ष राना । ऐसीकारके कार्यक्रमके दुसरे विशिष्ट अतिथी वडा नं. ७ के वडाअध्यक्ष मोति रानाथारु रहए । तिज पर्वके ताँहि वडासे होनिया सहयोग देन ताँही प्रतिबद्ध हौ बताइ ।

रानाथारु सामुदायमे तिज पर्व सामनकी अँधियारीसे शुरु हूइके सामनकी उजियारीक तृतिय तिथीक दिन तक जा तिउहार मनात हए । तिजकी अन्ति दिन महिला दिदीवहिनिय निरहार वर्त बैठके नदिया, निवारोमे जाइके समापन करत हए । रानाथारु सामुदायमे जा पर्व दोस्रो वडो पर्वके रुपमे मनात हएरहे हएँ । जा पर्वमे दिदीवहिनीयाँ भगवानसे अपन भइया औ भतिजोक ताँहि लम्बी उमरकी वरदान मागत हएँ ।