जेम्स राना/कञ्चनपुर, असार ६ । लालझाडी गाउँपालिका गाउँ कार्यपालिकाको २०७९–०२–१८ गते बैठी बैठकमे आ.ब. २०७९–०८० को सावन १ गते से लागु होनबारे स्वास्थ्यसे सम्बन्धि ३ निर्णय करि हय ।

बाईसी बिचवा, शंकरपुर और देखतभुली के स्वास्थ्य चौकी तथा आधारभुत स्वास्थ्य केन्द्र चान्देव और आधारभुत स्वास्थ्य केन्द्र सिकलपट्टि मे सञ्चालित प्रयोगशालासे देत आए सबय सेवा सुविधा निशुल्क करन पहिलो निर्णय करि हयँ । अईसी लालझाडी गाउँपालिकासे सञचालित ५ औ सुत्केरी सेवा केन्द्रमे आकस्मिक रुपमे सुत्केरी सेवा लेन आए और अप्ठयारो अवस्थामे दूर लैजान ताहीँ एम्बुलेन्स सेवा फिर निशुल्क देन ताहीँ दुसरो निर्णय करि हयँ ।

लालझाडी गाउँपालिका स्वास्थ्य सेवामे लगि महिलनके प्राथमिकता देतय तिसरो निर्णय करके महिलाप्रति सम्मान दिखाई हय । ६० बर्ष उमर पुगी महिला सामुदायिक स्वास्थ्य स्वयं सेबिकनके सम्मान कार्यक्रमे नगद ५१ हजार रुपैया दैके बिदाई करनको निर्णय करके लालझाडी गाउँपालिकाके प्रतिनिधि चारौ तरफ से धन्यवाद पानके सँग सँगय सबय लालझाडीबासीनके मन जितन सफल भय हयँ ।