जेम्स राना कञ्चनपुर जेठ २४ । कञ्चनपुरको बेलौरी नगरपालिका वडा नं. ५ भकुण्ड गावँकी श्री कालेश्वर महादेव मन्दिरमे गङ्गा दशहेरा मेला आजसे शुरु भव हय । जेठ महिनाको शुक्ल पक्ष दशमी तिथिके दिन मनात आए जा गङ्गादशहेराको अवशरमे भकुण्डको मेला जहे जेठ २४ गते से २८ गते तक भव्य रुपसे आयोजना कर रहे हयँ कहिके मेला मूल आयोजक समितिके अध्यक्ष कन्हैया राना बताई ।

”अपन कला सँस्कृतिको जगेर्ना करयँ, मेला क्षेत्रके शान्त और सफल बनामय” मूल नाराके सँग आयोजना होन जायरहो मेलामे सुदुरपश्चिमके तमान जिल्ला से लइके भारत से फिर भक्तजन आत हयँ । जा वर्ष भकुण्डको मेलामे करिब २० लाख से जद्धा दर्शनार्थी मेला अवलोकन करनको अनुमान करि हय आयोजक समिति । मेलामे साँस्कृतिक, मनोरञ्जनात्मक लगायत मेलमेलकी दुकान धरी हयँ । मेलाके चारौ तरफ करिब २ किलोमिटरको क्षेत्रमे दारु, लागु औषध सेवन, मछरी बुट्टी और अण्डा निषेध करि हयँ ।

अगर कुई नियम विपरित जाईगो तओ समितिको निर्णय अनुसार कारबाही हाईगी कहिके अध्यक्ष राना बताई । पौराणिक मान्यता अनुसार जेठ शुक्ल दशमीको दिन गङ्गा स्नान करनसे मन्नत पुरा होत हय । तभि मारे जा दिन दोंदा या और कुई नदियामे पुजाआजा करनके सँग भगवान शिवके जल चढाव जात हय । अईसो करनसे दश प्रकारके पाप नाश होनको कारण जा दिनके गङ्गा दशहेरा कहत हयँ । जा दिन ब्रत रहन और दान करनको बिशेष महत्व हय ।