जेम्स राना/कञ्चनपुर, जेठ १३ । कञ्चनपुरकी बेलाैरी नगरपलिका कार्यालय औ राष्ट्रिय वाणिज्य बैङ्क बिच कर्मचारीके ताँहि बिना धिताे कर्जा सम्बन्धी सम्झाैता भअाे हए । बेलाैरी नगरपलिका कार्यालय और मातहतमे कार्यरत स्थायी सेवाके कर्मचारीके ताँहि जा सम्झाैता करिहए राष्ट्रिय वाणिज्य बैङ्क बेलाैरी शाखाके प्रबन्धक महेश राज भट्ट जानकारी दैहए । बेनकि अनुसार नगरपलिका कार्यालय कार्यरत कम्तीमे २ बर्ष स्थायी सेवा अवधि पुगेके कर्मचारी बैङ्कसे निर्धारित रकम कर्जा लेन चाहेमे काेइ किसिमकाे धिताे धारन नपरहए । बाेके ताँहि सम्बन्धित कर्मचारीके पूर्ण विवरण सहित नगरपलिकाके सिफारिस करन पड्हए । फिर बैङ्क आवश्यक जाँचबुझके कर्जा उपलब्ध करए हए।

बेहे सम्झाैता बेलाैरी नगरपलिका नगर प्रमुख पाेतिलाल चाैधरी गत फागुन अन्तिम सातामे करी रहएँ । सम्झाैता अनुसार अब जल्दि जा सुविधा लेन मिल्न ताँही काम अगु बढाइके बैङ्कके शाखा प्रबन्धक भट्ट जानकारी दैइ हए। नगरपलिकामे स्थायी दरबन्दीमे कार्यरत कर्मचारीन्नके सहजता और सुविधा लेनके ताँहि बेलाैरी नगरपलिका कार्यलय औ राष्ट्रिय वाणिज्य बैङ्क बिच उनके सम्झाैता करके बेलाैरी नगरपलिकाके प्रमुख प्रशासकीय अधिकृत सुशीला लेखक बताइ हए ।