रानाथारु लेखक समाजसे होरी पर्वके अवसरमे फागुन १९ गते “होरी निवन्ध” प्रतियोगिताको आयोजना करीरहए । प्रतियोगिताको नतिजा चैत ५ गते घोषणा करनको कार्यसुचि अनुसार रानाथारु लेखक समाज विजेतनको नाम घोषणा करीहए ।

रानाथारु सामुदायकोे वडो तिउहार होरी पर्वके उपलक्ष्यमे लेखक समाज प्रतियोगिताकी आयोजना करीरहए । रानाथरु सामुदायकी होरी पर्व ३८ दिन तक मानत हए । अभयक युवामे पश्चिमा संस्कृतिको प्रभासे हमर पहिलेसे चलत आएरहो रितीरिवाज धिरे–धिरे हरात जाइरहिहएँ ।

तबहिक मारे जा तिउहारके उल्लासमय , भाइचराको सदभावको पर्वके रुपमे मनामय जा पर्वको महात्व युव पिढीमे और दुसरे सामुदायके आदमीके दर्शामय कहन उद्देश्यसे निवन्ध प्रतियोगिताको विधा धरोगओ रहए ।

प्रतियोगिताक निर्णयक मण्डलको निर्णयके मुताविक प्रथममे रञ्जीत राना बेला गावसे, द्घितिय अशोक राना देवहरिया गावसे और तृतिय राजकुमार राना सुन्दरपुर गाउसे और सन्तोनामे धमेन्द्र राना घसिटा गावसे विजय भइहएँ ।

पुरस्कृत भए प्रतियोगिनके प्रमाणपत्र और दोसल्लासे सम्मान करोजाबैगो बताइ हएँ संस्थाके अध्यक्ष नन्दलाल राना । प्रतियोगितामे एकसे बढके एक प्रतियोगि रहए तहु फिर प्रतियोगिताको मुल्यङ्कन विषय बहुत जटिल और बहुत सुन्दर पक्ष हए ।

निवन्ध प्रतियोगितामे सहभागि सबय प्रतियोगिनके हार्दिक शुभकामना आनबालो दिनमे फिर सहभागिता जनादेन आसरा लएहएँ अध्यक्ष राना कहि ।