नरेश राना/ लालझाडी
कञ्चनपुर जिल्लाको लालझाडी गाउँपालिकामा गाउँपालिका स्तरीय ख्रिष्टमस शुभकामना आदान–प्रदान कार्यक्रम भव्य तथा उल्लासपूर्ण वातावरणमा सम्पन्न भएको छ। लालझाडी गाउँपालिका वडा नम्बर २ स्थित सन्देश चर्चको प्राङ्गणमा आयोजना गरिएको उक्त कार्यक्रममा हजारौँ ख्रिष्टियन विश्वासीहरूको उल्लेखनीय उपस्थिति रहेको थियो।
कार्यक्रम कञ्चनपुर ईसाई समाज लालझाडीका अध्यक्ष भीम बहादुर चौधरीको सभाध्यक्षतामा सम्पन्न भएको हो। कार्यक्रमका प्रमुख अतिथिका रूपमा लालझाडी गाउँपालिकाका अध्यक्ष निर्मल राना सहभागी हुनु भएको थियो। यस्तै, विशिष्ट अतिथिहरूमा वडा नम्बर ४ का वडा अध्यक्ष बहादुर राना तथा वडा नम्बर ६ का वडा अध्यक्ष हर्क नारायण जोशीको उपस्थिति रहेको थियो।
कार्यक्रमको सुरुवात स्वागत मन्तव्यसहित गरिएको थियो, जसमा पास्टर सर्मिला रानाले ख्रिष्टमस पर्वको धार्मिक, सामाजिक तथा सांस्कृतिक महत्वमाथि प्रकाश पार्दै शान्ति, प्रेम र आपसी सद्भावको सन्देश दिनु भएको थियो। उहाँले यस्ता कार्यक्रमहरूले समाजमा आपसी भाइचारा, सहिष्णुता र एकताको भावना विकास गर्न महत्वपूर्ण भूमिका खेल्ने बताउनु भयो।
प्रमुख अतिथि निर्मल रानाले शुभकामना मन्तव्य दिँदै ख्रिष्टमस पर्वले मानवतावाद, प्रेम र सेवाको सन्देश दिने उल्लेख गर्नु भयो। उहाँले लालझाडी गाउँपालिकामा सबै धर्म, संस्कृति र समुदायबीच आपसी सद्भाव कायम रहेको भन्दै यस्ता कार्यक्रमलाई गाउँपालिकाले सधैं सम्मान र सहयोग गर्ने प्रतिबद्धता व्यक्त गर्नु भयो।
कार्यक्रममा लालझाडी गाउँपालिकाभित्रका सम्पूर्ण पास्टरहरू, सेवकहरू, जनप्रतिनिधिहरू तथा विभिन्न संघ–संस्थाका प्रतिनिधिहरूको सहभागिता रहेको थियो। साथै, स्थानीय कलाकारहरूद्वारा प्रस्तुत गरिएका विविध सांस्कृतिक कार्यक्रमहरूले कार्यक्रममा थप रौनक थपेका थिए। भजन, नृत्य तथा गीतमार्फत ख्रिष्टमसको खुशी साटासाट गरिएको थियो।
कार्यक्रमको सञ्चालन पास्टर सुकराम रानाले गर्नु भएको थियो। उहाँले कार्यक्रमलाई व्यवस्थित, अनुशासित र उत्साहजनक रूपमा अगाडि बढाउनु भएको थियो।
समग्रमा, लालझाडी गाउँपालिका स्तरीय ख्रिष्टमस शुभकामना आदान–प्रदान कार्यक्रम धार्मिक सहिष्णुता, सामाजिक एकता र आपसी सद्भावको सन्देश प्रवाह गर्न सफल भएको सहभागीहरूले बताएका छन्।
