धनगढी । सुदूरपश्चिम प्रदेश सभाको बैठक सञ्चालन अनिश्चित बनेको छ । आगजनी र तोडफोड गरिएको प्रदेश सभा भवनसहित अन्य संरचना मर्मत नगरिएकाले प्रदेश सभा बैठक सञ्चालन अनिश्चित बनेको हो । जेनजी आन्दोलनका क्रममा प्रदेश सभा भवनसहित प्रदेश सभा सचिवालय, विषयगत समितिका कार्यालय, संसदीय दलका कार्यालयमा आगजनी र तोडफोड गरिएको थियो ।

आगजनी र तोडफोडबाट प्रदेश सभाका ९० प्रतिशत संरचना नष्ट भएको छ  । मर्मत नगरी बैठक सञ्चालनको अन्य कुनै विकल्प नरहेका कारण प्रदेश सभा बैठकको सम्बन्धमा अहिलेसम्म कुनै पनि टुङ्गो नलाइएको सभामुख भीमबहादुर भण्डारीले बताए । प्रदेश सभामा आगजनी र तोडफोड भएको एक महिना पुग्न लागे पनि मर्मतको काम अझै सुरु भएको छैन ।

मर्मतको कार्य अगाडि बढाउन छलफल भइरहेको भन्दै सभामुख भण्डारीले मर्मत नगरिकन प्रदेश सभा बैठक सञ्चालन गर्र्न नसकिने उल्लेख गरे । उनले थपे, ‘ठाउँ नै छैन, कहाँ बसाउने रु अब सबै काम तिहारपछि मात्रै हुन्छ ।’ प्रदेश सभाको पछिल्लो बैठक भदौ ५ गते बसेको थियो  । जेनजी आन्दोलनकारीले भदौ २४ गते आगजनी र तोडफोड गरेपछि नीति निर्धारण तथा कानुन निर्माण जस्ता महत्वपूर्ण कार्य गर्ने यो संस्था बन्द रहने समय अझै लम्बिएको छ ।

आगजनी र तोडफोडबाट १२ करोड रुपियाँभन्दा बढी क्षति भएको सभामुख भण्डारीले उल्लेख गरे । मुख्यमन्त्री तथा मन्त्रीपरिषद्को कार्यालयले तयार पारेको प्रारम्भिक विवरण अनुसार प्रदेश सभा सचिवालयमा आगजनी र तोडफोडबाट सात करोडभन्दा बढी क्षति भएको छ । आगजनीबाट छ करोड ९३ लाख २१ हजार रुपियाँ बराबरका भौतिक सम्पत्ति नष्ट भएको जनाइएको छ ।

यसै गरी प्रदेश सभा सचिवालयले भुक्तानी दिन बाँकी रहेको आठ लाख ६० हजार रुपियाँ बराबरको दुई थान डिजिटल डिस्प्ले बोर्ड, ६० हजार रुपियाँ बराबरको दुई थान सोफासेट जलेर नष्ट भएको छ  । यसका भुक्तानी दिन बाँकी रहेको विवरणमा उल्लेख छ  । यसै गरी सहरी विकासबाट भएको ठेक्कामध्ये हस्तान्तरण नभएको रोष्टम एक थान, एसी दुई थान जलेर नष्ट भएको जनाइएको छ ।

प्रदेश सभा सचिवालयको ६९ लाख ९९ हजारको एउटा मिनी बस, तीन करोड ३१ लाख ४९ हजार रुपियाँको छ वटा जिप, ७१ लाख ९५ हजार रुपियाँको पिकअप भ्यान, आठ लाख २६ हजार बराबरको चार वटा मोटरसाइकल नष्ट भएको विवरणमा उल्लेख छ ।