शुक्रराज राना/बेलाैरी ११ असोज । कञ्चनपुरकी बेलौरीमे विजया दशमी औ शुभ दिपावली बिशेष साँस्कृतिक और शुभकामना आदान प्रदान कार्यक्रम २०७९ हाेन बालाे हए । बेलौरी नगरपालिका वडा नम्बर ०४ की आयोजनामे औ पुर्व बिद्यार्थि समाज शान्तिपुरके सह–आयोजनामे जहे असोज १५ औ १६ गते श्री शान्ति माध्यमिक बिद्यालय शान्तिपुरमे विजया दशमी और शुभ दिपावली बिशेष साँस्कृतिक और शुभकामना आदान प्रदान कार्यक्रम २०७९ हाेन बालाे हए । साँस्कृतिक औ शुभकामना आदान प्रदान कार्यक्रम २०७९ के सम्पुर्ण ब्यवस्थापन औ सफल बनानके ताँही सोमबार तमान समिति गठन औ कामके बाँडफाँड करीहएँ । मुल समितिके संयोजकमे रुद्र प्रसाद अधिकारी, उप संयोजकमे राजेन्द्र भट्ट चयन भए हएँ । सदस्यमे बाल कुमार पोखरेल, धनसरी सुवेदी, डम्बर बहादुर चौधरी, जितेन्द्रराज थपलिया, धन बहादुर रावल, रितु गैरे, कमल ढकाल, साबित्री अर्याल औ शिसिर चापाँगाई चयन भए हएँ । अइसी करके सल्लाहकार समितीमे पदमपानि ढकाल, प्रेम बहादुर थापा, लक्ष्मण खरेल, उमा भण्डारी और शिवराज राना चयन भए हएँ ।

कार्यक्रमके आर्कषकके रुपमे चर्चित राष्ट्रिय तथा स्थानिय कलाकारकी सहभागिता रहइगाे करके आयोजक बतइ हएँ । कार्यक्रममे चर्चित लोक औ दोहोरी गायक बद्री पंगेनी, चर्चित लोक औ देउडा गायक लाल बहादुर धामी (अछामी बड्डो) गायिका समिक्षा चौधरी, गायक नवराज कलौनी, मोडल सुरज रावल और स्थानिय हास्यब्यंग्य कलाकार तिर्थराज जोशीकी बिशेष प्रस्तुती रहग्गाे सांगए श्री शान्ति मा.बि. शान्तिपुरके बिद्यार्थीकी फिर सांगितिक प्रस्तुती प्रस्तुत करंगे करके बिद्यालयके प्रधानाध्यापक प्रेम बहादुर थापा बताइ हएँ । कार्यक्रमकी पहिलो चरणमे वडा कार्यालयकी तर्फसे शुभकामना आदान प्रदान और बेलौरी नगरपालिका वडा नम्बर ०४ के जेष्ठ नागरिककी सम्मान करन और दोस्रो चरणमे पुर्व बिद्यार्थी समाज शान्तिपुरकी साँस्कृतिक कार्यक्रम सञ्चालन करनकी सँगए बेलौरी नगरपालिका वडा नम्बर ०१ से १० सम्मकी वडा अध्यक्षके सम्मान करन कार्यक्रमकी आयोजना हाेन बेलौरी नगरपालिका वडा नम्बर ०४ के वडा अध्यक्ष अर्जुन ढकाल बताइ हएँ ।