धनगढी,१९ फागुन ।
रानाथारु लेखक समाजसे होरी पर्वके अवसरमे “होरी निवन्ध” प्रतियोगिता करैया हए । रानाथारु सामुदायकोे वडो तिउहारके रुपमे होरी पर्वके मनात हए । रानाथरु सामुदाय होरी पर्व ३८ दिन तक मानत हए । अभयक युवामे पश्चिमा संस्कृतिको प्रभासे हमर पहिलेसे चलत आएरहो रितीरिवाज धिरे–धिरे हरात जाइरहिहएँ ।
तबहिक मारे जा तिउहारके और उल्लासमय , भाइचराको सदभावको पर्वके रुपमे मनामय जा पर्वको महत्त्व युवा पिढीमे और दुसरे सामुदायके आदमीके दर्शामय कहन उद्देश्यसे निवन्ध प्रतियोगिताको विधा धरोगओ कहिके बताइ अध्यक्ष नन्दलाल राना । रानाथारु लेखक समाज सामुदायसे जुडि अन्य विधाके बारेम फिर समय–समयमे प्रतियोगिता करामंगे कहिके जानकारी दइहएँ ।
प्रतियोगिताको शीर्षक “होरी ” निवन्ध प्रतियोगिता रहवैगो । प्रतियोगि अपना रचना २०७८ साल चैत ३ गते रात १२ बजे भितर तरे दओगओ ठिहामे पठाडारन पडो और पच्छु आओ रचनाके कार्यक्रममे समावेश नकराओ जाबैगो बताइहएँ । ऐसीकरके निवन्धको भाषा “रानाथारु भाषा” मे लिखो होन पडैगो । निवन्ध पिडीएफ फाइल बनाएके या फोटो खिचके पठान पडैगो । प्रतियोगि अपन नाम, ठिहा और सम्पर्क नम्बर स्पष्ट लिखके पठान पडैगो । प्रतियोगिनको नाम निर्णायक मण्डलसे २०७८ चैत ५ गते साँझक ७ बजे घोषणा करोजाबैगो ।
प्रथम, द्वितीय, तृतीय और एक जनिक सान्त्वना करके चार जनक दोसल्ला, प्रमाणपत्र सहित ट्रफिसे सम्मान करोजाबैगो बताइहएँ ।
पठानबालो ठिहा :– ranatharu.com की messenger की इन बक्समे या धनगढी ७ देवहरीया फाेन नं. 9848463176,9848422576 या gmail- ranatharuwa@gmail.com या nandlalrana234@gmail.com .
