रानाथारू भाषाको पहिलो वेवसाइट
रानाथारू भाषाको पहिलो वेवसाइट
कञ्चनपुर । कञ्चनपुर जिल्लाको लालझाडी गाउँपालिका–५ मा अवस्थित देखतभुली स्वास्थ्य चौकी जिल्लाकै पहिलो ‘पोषणमैत्री संस्था’ को रूपमा घोषणा गरिएको छ। सोमबार एक विशेष कार्यक्रमकाबीच सो स्वास्थ्य संस्था पोषणमैत्रीको रूपमा घोषणा गरिएको हो।
स्वास्थ्य सेवा सुधार, मातृ तथा शिशु पोषणमा पहुँच अभिवृद्धि, र स्थानीय समुदायमा पोषणप्रति चेतना फैलाउने उद्देश्यका साथ देखतभुली स्वास्थ्य चौकीले उल्लेखनीय उपलब्धि हासिल गरेको छ।
१६ मध्ये १५ सूचकमा सफलता
पोषणमैत्री स्वास्थ्य संस्था कार्यान्वयन निर्देशिका २०७९ अनुसार कुल १६ वटा सूचक तय गरिएको छ, जसको आधारमा कुनै पनि स्वास्थ्य संस्थालाई पोषणमैत्री घोषणा गरिन्छ। देखतभुली स्वास्थ्य चौकीले तीमध्ये १५ वटा सूचकमा सफलता प्राप्त गर्दै औसतमा ९० प्रतिशतभन्दा बढी उपलब्धि हासिल गरेको जनाएको छ।
स्वास्थ्य चौकीले मातृ र नवजात स्वास्थ्य सेवा, स्तनपान प्रवर्द्धन, पोषणसम्बन्धी परामर्श सेवा, बालबालिकाको वृद्धि निगरानी, पोषण शिक्षासम्बन्धी कार्यक्रम तथा नियमित पोषण मूल्यांकन लगायतका क्षेत्रमा उल्लेखनीय कार्य गरेको छ।
सामुदायिक सहभागिता र जनचेतना
स्वास्थ्य चौकीका प्रमुखले जनाएका अनुसार यस उपलब्धिमा स्थानीय जनप्रतिनिधि, महिला स्वास्थ्य स्वयंसेविका, समुदायस्तरका संघ–संस्था र आम नागरिकको सहभागिता महत्वपूर्ण रहेको छ। पोषणका क्षेत्रमा देखिएको सक्रियता र प्रतिबद्धता नै संस्थालाई पोषणमैत्री बनाउने आधार भएको बताइएको छ।
अबकाे लक्ष्य: उत्कृष्ट अभ्यासको विस्तार
घोषणासँगै देखतभुली स्वास्थ्य चौकीले अब पोषणमैत्री अभ्यासलाई थप मजबुत बनाउने र अन्य स्वास्थ्य संस्थालाई पनि प्रेरणा दिने लक्ष्य लिएको छ। स्वास्थ्य चौकीले आफ्नो अनुभव अन्य स्थानीय तहका स्वास्थ्य संस्थाहरूसँग साझा गर्ने तयारी गरेको छ।
