रानाथारू भाषाको पहिलो वेवसाइट
रानाथारू भाषाको पहिलो वेवसाइट
उमेश राना/किर्तिपुर, काठमाडौँ
मए अभएक घटनाक्रमन्के देखके बहुत चिन्तित हओँ । नेपाल रानाथारु समाजमे दुई समानान्तर समितिन्को गठन हुइगओ हए । जा स्थिति हम सबएके ताहिँ एक चिन्ताकि विषय हए, काहेकि हमर समुदायकि एकता और समर्पणप्रति जा एक बडो धक्का हए ।
मोए लागत हए कि जे समानान्तर समितिन्कि गठनसे हमर प्रयास और स्रोतन्कि विभाजन कर सकत हए । हमर समुदाय बडो लम्बो समयसे पहिचान और अधिकारकि ताहिँ संघर्ष करत आओ हए और ऐसो विभाजनसे हमके एकजुट हुइके अग्गु बढनमे अवरोध पुगइगो । एकता त हमर शक्ति रहए, पर जा विभाजनसे बाके कमजोर बनाए सकत हए ।
नेपाल रानाथारु समाजमे दुई समानान्तर समितिन्को गठन होनसे सम्भावित परिणामन्ः
१. समुदायकि प्रयास और स्रोतन्कि विभाजन
दुई समिति काम करत पेति प्रयास, कोष और स्रोतन्कि विभाजन होन सक्हए । जौनकि कारण परियोजना दोहरन या स्रोतन्कि अप्रभावी प्रयोग होन सक्हए । जासे एकीकृत कार्यक्रम, परियोजना और पहलन्मे असर पडन सक्हए ।
२. समुदायकि एकता कमजोर होनो
समानान्तर समिति होनको कारण सदस्यन् दुई पक्षमे विभाजित होन सक्हएँ । जासे एकता और साझा उद्देश्यन्के क्षति पुगन सक्हए । समुदायकि पहिचान और मूल्यमान्यतान्के कायम करन ताहिँ एकता अत्यन्त महत्वपूर्ण होत हए ।
३. विश्वासनीयता और प्रभावमे कमी
जब दुई निकाय समुदायकी प्रतिनिधित्व करत हएँ तओ बाह्य संस्था, सरकारी निकाय या गैरसरकारी संस्थान्के अन्योलता होत हए कि कौनके आधिकारिक मानए । जासे राष्ट्रिय स्तरमे रानाथारु समुदायकी प्रभावकारी आवाजके कमजोर बनएहए ।
४. नेतृत्व और प्रतिनिधित्वमे अन्योलता
समानान्तर संरचनासे समुदायमे कौन कैसो प्रतिनिधित्व करत हए, जामे अन्योलता पैदा हुइ सकैगो । जाको कारण निर्णय प्रक्रियामे बाधा पुगन सकैगो और समुदायकि साझा मुद्दान्मे एकीकृत दृष्टिकोण कमजोर होबइगो ।
५. आन्तरिक विवादकि सम्भावना
दुई समिति बीच विवाद बढइगो तओ तमाम् आन्तरिक संघर्ष बाहेर आन् सम्भावना होबइगो । जौनकि कारण समुदाय भितर विभाजनकी स्थिति सिर्जना करन सक्हए और दीर्घकालीन विकास प्रयासन्मे अवरोध पुगान् सक्हए ।
६. नेतृत्व उपर विश्वासकि कमी
समुदायके कुछ सदस्य असन्तुष्ट या निराश महसुस करन सक्हएँ, फलस्वरुप विश्वासमे कमी आन् सकैगो । अगर आपनकि रानाथारु समुदाय देखी कि नेतृत्व जनताकि आवश्यकता, समस्या और हकहितके प्राथमिकता देनकी सट्टा विवादके महत्त्व देन डटो हए तओ नेतृत्व उपरको विश्वास कम होन् सकैगो ।
जा अवस्थामे सबसे उपयुक्त समाधान कहोक दुने पक्ष एकताबद्ध हुइके एकल नेतृत्वकि निर्माण करन हए, जो समुदायकि हितके बढावा देन सकए । जो पक्को आवाज और भविष्यकि पुस्तान्के ताहिँ स्थिर आधार सुनिश्चित कर्हए ।
तभि मए आशा करत हओँ कि आपन एकजुट हुइके एकीकृत नेतृत्वकी दिशामे अगारु बढन् सकएँ । एकिकृत समिति बनाएके, आपन आपनकि सामूहिक आवाजके सशक्त बनान और समुदायकी आवश्यकतन्के प्राथमिकता देन सक्हएँ ।
समानान्तर समिति गठनसे रानाथारु समुदायके गम्भीर मोडमे लाएदई हए । अभए आपनको ध्यान एकता और सहयोगमे केन्द्रित करन आवश्यक हए, ताकि आपन रानाथारु जनतान्की उज्ज्वल भविष्यके ताहिँ संगए काम करन सकएँ ।
