जेम्स राना/ कञ्चनपुर १ असार । कञ्चनपुर शुक्लाफाँटा नगरपालिकाके नगर वडघर/भलमन्सा समितिके भलमन्सामे शुक्लाफाटा १२ तिल्कीके भलमन्सा वचन सिह राना चयन भए हए । मंगलवार शुक्लाफाटा ६ कसरौलमे बैठाे वडघर/भलमन्सा नगर भेलामे राना सर्वसहमत वडघर/भलमन्सामे चयन भए हएँ l शुक्लाफाटा नगरपालिके क्षेत्रभरके ४ दर्जनसे जधा भलमन्सानकाे भेलासे नगर स्तरिय वडघर/भलमन्सा समितिके सह वडघर/भलमन्सामे शुक्लाफाटा ३ पिपलाडीके लक्ष्मण चौधरी, कोषध्यक्षमे शुक्लाफाटा १ की माया चौधरी, चौकीदार(चाकर) मे शुक्लाफाटा ६ के रतन सिह राना, सह चौकीदार(चाकर) मे वडा नं. १२ की फुल कुमारी राना चयन करि हएँ।

औअइसी समितिके सदस्यमे क्रमशः वडा नं ४ के सुग्रिव राना, २ के चन्द्र वहादुर चौधरी, छोटेलाल राना, सुनिल चौधरी, हिमाली चौधरी, लाहनु चौधरी, भोसु राम चौधरी, जय सिह राना, हवलदार चौधरी, कालुराम डगौरा और मायामोती चौधरी निर्विरोध चयन भइ हए। नगरके १२ वार्डसे एक एक जानै प्रतिनिधी औ तिन जना ममोनितमे करके जम्मा १५ जनाके नगर वडघर/भलमन्सा समिति गठन करि करके आदीवासी जनजाती महासंघ शुक्लाफाटा नगर समन्वय समितिके अध्यक्ष रतनलाल राना जानकारी दैइ हए। शुक्लाफाटा नगरपालिके स्तरिय वडघर/भलमन्सा नगर भेलामे थारु समुदायसे नवनिर्वाचित वडा नं २ के वडा अध्यक्ष भोदुराम डगौरा, ३ के अध्यक्ष नरेन्द्र चौधरी, १२ के वडा अध्यक्ष नवल सिह राना लगायत वडा सदस्यनके टिका और फुलमालासे स्वागत और सम्मान करिहएँ।

शुक्लाफाटा नगरपालिका बनाइ थारु समुदायके प्रथा जन्य कानून वडघर/भलमन्सा परिचालन ऐन २०७८ अनुसार नगरमे नगर स्तरिय समिति, वडामे गाउ स्तरिय औ टोलमे टोल वडघर/भलमन्सा समिति चयन करन प्रावधान अनुसार समिति चयन करिहए आदीवासी जनजाती नगर समन्वय समितिके सचिव सुग्रिव राना बताइ हएँ।