कञ्चनपुर,११ बैशाख । कञ्चनपुरको भीमदत्त नगरपालिका आज सुम्मारसे व्यक्तिगत श्रम स्वीकृति और पुनः श्रम स्वीकृति देन शुरु करिहए । स्थानीय तहसे श्रम स्वीकृत देनबालो मैसे भीमदत्त नगपालिका सुदूरपश्चिम प्रदेशकाे पहिलो पालिका हए। वैदेशिक रोजगारमे जानबाले स्थानीय नागरिक नगरको रोजगार सेवा केन्द्रसे श्रम स्वीकृति लेन सक्कहए करके बताइ।
भीमदत्त नगरपालिका २ जानै स्थानियके सुम्मार श्रम स्वीकृत प्रदान करि हए। वडा नम्बर ९ निवासी आनन्द सिंह रावत और वडा नम्बर ८ निवासी भवान सिंह भण्डारी भीमदत्त नगरपालिकाकाे नगर उपप्रमुख और कार्यवाहक नगरप्रमुख नीलम लेखक जोशी खादा ओडाए औ श्रम स्वीकृत पत्र प्रदान करि हए ।
सुम्मारसे नगरको रोजगार सेवा केन्द्रम आवेदन करि श्रम स्वीकृति और पुनः श्रम स्वीकृति लए सक्क हए, भीमदत्त नगरपालिकाक कार्यवाहक नगर प्रमुख जोशी बताइ। ‘विगतमे श्रम स्वीकृति लेन राजधानी काठमाण्डौँ जान बाध्यता, समयमे काम नहाेन, खर्च जधा लगनाे अइसि गजब समस्या वैदेशिक रोजगारमे जान बाले आदमिक भोग्न पडात रहए।’ उनके कहाइ ‘जब सरकार श्रम स्वीकृत स्थानीय तहसे देनको प्रावधान ल्याइ तबसे हम, हामर कर्मचारी वैदेशिक रोजगारमे जानबाले आदमि जित्नाे जल्दी नगरपालिकासे श्रम स्वीकृती प्रदान करनके काम करि और आजसे नगरपालिका श्रम स्वीकृत प्रदान करनके सेवाको सुरुवात भओ हए ।’
उनके अग्गु कही ‘अब पहिले जइसाे समस्या स्थानीयके भोग्नके नपडा हए।’ नगरपालिकासे श्रम स्वीकृत पाइके भीनपा–९ काे रावतके खुशी लागाे करके बताइ । ‘पहिले जा श्रम स्वीकृति लेन काठमाण्डौँ जान पडात रहए ,तओ हुना होटेलमे बैठ्न , अन्त, जानकाे गाडी भाडा लगायत गजब खर्च हाेत रहए।’ बे कही ‘खर्च भएसे फिर समयमे काम नहाेनाे,
तमान प्राविधिक कारण दिखानाे काम नकरदेन लगायतकाे गजब समस्या झेल्न बाध्यता रहए।’ उनके अग्गु कहि ‘अभाए आपनी घर अग्गुक नगरपालिकासे श्रम स्वीकृति पानसे गजब खुशी लागाे हए। जासे हाम विदेश जान गजब सहज भओ हए करके महशुस भओ हए।’ भीमदत्त नगरपालिकाक रोजगार संयोजक मीन बहादुर महराक अनुसार सरकारी व्यवस्था अनुसार वैदेशिक रोजगारके थप व्यवस्थित, सुरक्षित,
मर्यादित, भर्दो और सहज बन्नाके स्थानीय तहसे बाेकी व्यवस्था सुरु करि हए। गओ चैत १६ गते नेपाल सरकार (प्रधानमन्त्री और श्रम, रोजगार औ सामाजिक सुरक्षा मन्त्रालय) को मन्त्रीस्तरीय निर्णयसे वैदेशिक रोजगारमे जान चाहान बाले नागरिक सम्बन्धित स्थानीय तहसे श्रम स्वीकृति और पुनः श्रम स्वीकृति लेन पड् हए करके निर्णय भओ हए।
