नेपाल। उत्तराखण्ड, उत्तरप्रदेश और नेपालके रानाथारु एक जगहा मेँ ४८२औँ विरशिरोमणी महाराणा प्रतापकी जयन्ती मनाइ हएँ । आज थारु विकास भवन खटिमा मे राणा थारु परिषद खटिमा जिल्ला ऊधम सिंहनगर उत्तराखण्ड, कार्यक्रम की आयोजना करिरहए ।

कार्यक्रम संस्थाके अध्यक्ष दान सिंह राणाके सभाअध्यक्षतामे सम्पन्न भव रहए कहेसे कार्यक्रमके प्रमुख पहुना विधायक नानकमता क्षेत्र गोपाल सिंह राणा रहए । विधायक राणा कहि, “हरेक जात जाति अपन भाषा संस्कृति संरक्षणमे लगेहए, सव अपन पहिचान दिखान चहाय रहो हए पर हमर जातके लोग अपन पहिचान भुल के दुसरेक संस्कृतके अपनिया रहेहए । जा हमारी वहुत बडि भुल हए बताई ।”

कार्यक्रमके विशिष्ट पहुना संविधान सभासदस्य,नेपाल रानाथारु समाजके पुर्व अध्यक्ष कृपाराम राना रहए । बे कहि, “नेपालमे रानाथारुकी जात सुचिकरण हुइगौ हए इतका इकल्लो नाय रानाथारुकी भाषा की पहिचान, रानाथारुको अलग जनगणा हुइगौ हए कहि ।” कार्यक्रमके दुसरे विशिष्ट अतिथी थारु जनकाल्याण संस्था खिरीके अध्यक्ष छैलविहारी राना कार्यक्रमको शुभकाना दइरहए ।

कार्यक्रम मे शुभकामना देन बारे राज्यमन्त्री आदिवासी सल्लहकार परिषदके गिताराम ग्रोवर, उत्तराखण्ड आदिवासी जनजाति आयोगके अध्यक्ष लिलावती राणा, नेपालके पहुना लालझाडी गाउ पालिका अध्यक्ष निर्मंल राना, नेपाल रानाथारु समाज के केन्द्रिय अध्यक्ष कमल सिह राना, महासचिब तिर्थराज राना, सचिब साहेब राना, जिल्ला अध्यक्ष प्रेमबति राना लगायतको उपस्थित रहए ।

कार्यक्रमे स्थानिय कलाकार द्वारा होरी नृत्य फिर देखाइ रहए ।