लालझाडीमा पाँचौँ लालझाडी अध्यक्ष कप फुटबल प्रतियोगिता-२०८३ सम्पन्न, अरनिको–११ बन्यो च्याम्पियन नरेश राना कञ्चनपुर : कञ्चनपुरको लालझाडी गाउँपालिका–२ कञ्जमा सञ्चालन भएको पाँचौँ लालझाडी अध्यक्ष कप फुटबल प्रतियोगिता–२०८३ सम्पन्न भएको छ। अमर ज्योति युवा क्लबको आयोजनामा तथा लालझाडी गाउँपालिकाको मुख्य प्रबर्धनमा प्रतियोगिताको पाँचौँ संस्करण सम्पन्न भएको हो । गत कात्तिक २१ गतेदेखि सुरु भएको प्रतियोगिता सोमबार कात्तिक ३० गते समापन भएको हो । प्रतियोगितामा २२ टोलीको सहभागिता रहेको थियो। प्रतियोगिताको उपाधि अरनिको–११ ले जितेको छ भने पुनर्वास लेजेन्ड्स उपविजेतामा सीमित भएको छ। प्रतियोगितामा विजेता टोली अरनिको–११ ले प्रथम पुरस्कार १ लाख ५० हजार ५ रुपैयाँसहित ट्रफी, मेडल र प्रमाणपत्र प्राप्त गरेको छ। त्यस्तै, उपविजेता पुनर्वास लेजेन्ड्सले १ लाख ५ रुपैयाँसहित ट्रफी, मेडल र प्रमाणपत्र प्राप्त गरेको छ। प्रतियोगितामा विभिन्न विधागत पुरस्कारको समेत व्यवस्था गरिएको आयोजकले जनाएको छ। प्रतियोगिताको समापन समारोह अमर ज्योति युवा क्लबका अध्यक्ष हीलेन्द्र राना को सभाध्यक्षतामा सम्पन्न भएको थियो। कार्यक्रममा लालझाडी गाउँपालिकाका अध्यक्ष निर्मल राना प्रमुख अतिथिका रूपमा सहभागी थिए। विशिष्ट अतिथिमा लालझाडी गाउँपालिका–५ का वडाध्यक्ष पहल बहादुर थापा र वडा नम्बर २ का वडाध्यक्ष आशाराम राना सहभागी थिए। कार्यक्रममा स्वागत मन्तव्य क्लब का सचिव नीरबहादुर रानाले राखेका थिए भने कार्यक्रम सञ्चालन ओमप्रकाश रानाले गरेका थिए। स्थानीयस्तरमा फुटबल खेलको विकास, खेलाडीको प्रतिभा पहिचान तथा खेलकुदमार्फत युवालाई सकारात्मक गतिविधिमा जोड्ने र लागू औषध नियन्त्रणको उद्देश्यसहित प्रतियोगिता आयोजना गरिएको हो। लालझाडी गाउँपालिकाको निरन्तर आर्थिक सहयोगमा प्रतियोगिताले पाँचौँ संस्करणसम्मको यात्रा पूरा गरेको आयोजकले जनाएको छ।