कञ्चनपुरको कृष्णपुर नगरपालिका–३ र लालझाडी गाउँपालिका–५ वडा कार्यालयको संयुक्त समन्वय तथा पहलमा रसुवा र भोटेकोशी क्षेत्रमा आएको बाढीबाट प्रभावित परिवारका लागि राहत संकलन अभियान सञ्चालन गरी आर्थिक सहयोग प्रदान गरिएको छ।
बाढीका कारण बेपत्ता भएका व्यक्तिका परिवारलाई राहतस्वरूप प्रति परिवार रु. ८० हजार आर्थिक सहयोग उपलब्ध गराइएको छ। त्यस्तै, बाढीमा परी घाइते भएर उपचारपछि घर फर्किएका परिवारलाई प्रति परिवार रु. २५ हजार आर्थिक सहयोग प्रदान गरिएको जनाइएको छ।
प्राकृतिक विपत्तिका कारण परिवारका सदस्य बेपत्ता हुनुका साथै घाइते भएका परिवारलाई केही राहत पुगोस् भन्ने उद्देश्यले कृष्णपुर नगरपालिका–३ र लालझाडी गाउँपालिका–५ वडा कार्यालयको संयुक्त समन्वयमा राहत संकलन अभियान सञ्चालन गरिएको थियो। अभियानमार्फत स्थानीयस्तरबाट सहयोग संकलन गरी पीडित परिवारसम्म पुर्याउने पहल गरिएको हो।
रसुवा र भोटेकोशी क्षेत्रमा आएको बाढीले जनधनमा क्षति पुर्याएपछि पीडित परिवारको दुःखमा साथ दिन स्थानीय तह, जनप्रतिनिधि तथा स्थानीय नागरिकको सहभागितामा राहत अभियान अघि बढाइएको बताइएको छ। संकलित सहयोग रकम सम्बन्धित पीडित परिवारलाई हस्तान्तरण गरिएको हो।
बाढी तथा प्राकृतिक विपत्तिका कारण आफन्त गुमाउने, बेपत्ता हुने र घाइते हुने परिवार आर्थिक तथा मानसिक रूपमा समेत कठिन अवस्थामा रहने भएकाले यस्तो सहयोगले उनीहरूलाई तत्कालीन अवस्थामा केही राहत पुग्ने अपेक्षा गरिएको छ।
राहत अभियानमा सहयोग गर्ने सम्पूर्ण व्यक्ति तथा संस्थाप्रति वडा कार्यालयहरूले धन्यवाद व्यक्त गर्दै आगामी दिनमा पनि विपद्का बेला पीडित परिवारलाई आवश्यक सहयोग र सहकार्य जारी राख्ने प्रतिबद्धता जनाएका छन्।
स्थानीय तह र समुदायबीचको सहकार्यबाट संकलन गरिएको राहतले विपत्तिमा परेका परिवारलाई सहयोग पुर्याउनुका साथै पीडितको दुःखमा स्थानीय समुदायको साथ र ऐक्यबद्धता रहेको सन्देशसमेत दिएको छ।
