धनगढी उप-महानगरपालिका वार्ड न. ७ को मनेहरा गाँवको मनेहरा स्पोर्ट्स क्लबसे आयोजित मनेहरा कपको तेस्रो संस्करण मनेहरा कप २०८२ खुल्ला वार्ड स्तरीय पुरुष भलिबल प्रतियोगिता समापन भओ हए ।

जामे पहिलो स्थानमे डडेल्धुराको परशुराम नगरपालिकाको टिम, दुसरो स्थानमे आयोजक (A) टिम और तिसरो स्थानमे धनगढीको रानाथारु आदर्श युवा क्लबको टिम भए हएँ। मिति २०८२ क्वाँर २३ गतेसे सुरु भओ जा प्रतियोगितामे १९ टिम सहभागी भइ रहएँ । पहिलो पुरुस्कार रु. २५,५२५ , दुसरो पुरुस्कार रु. १५,५२५ और तिसरो पुरुस्कार रु. ७,५२५ को रहए । कार्यक्रमको मुख्य उद्देश्य खेलाडीको उत्पादन और अभे सामाजिक विकृतिके रुपमे फैलो लागु औषधके न्युनिकरण करन कहिके आयोजक बताईँ

कार्यक्रमको प्रमुख अतिथी जहे वाडाके वार्ड अध्यक्ष मोती राना रहए, अइसि विशिष्ट अतिथी वार्ड सदस्य बासु राना रहएँ । अतिथिमे मनेहरा सामुदायिक बनके कार्यालय सचिब लोकेन्द्र ठकुल्ला, वार्ड सदस्य विक्रम खाती लगायत गाँवके भलमन्सा रहएँ । कार्यक्रमको अध्यक्षता क्लबके अध्यक्ष रुपक चौधरी करि रहएँ ।
कार्यक्रम विभिन्न रानाथारु पहिरनमे झाँकी प्रस्तुत भइ रहए और तमान लोकल नाचगान फिर दिखाव गओ रहए ।
कार्यक्रममे खेलमैदानको आवश्यकताके बारेमे बात उठो रहए । भलिबल खेलन ताही मैदानको व्यवस्थापन करन क्लब आगु बढन पडो कहिके बक्ता लोग बात धरि रहएँ ।