भक्तराज राना

कछु मिर सौख,  कछु जरुरीके कारण मए कैलाली और कंचनपुर जिल्लाके तमान गाउँ के सरकारी स्कुल मे घुम घाम करो हओं । जहे घुमाइमे मए एक दर्जन से जाधा स्कुल देखो जहाँ ८० से लैके ९० प्रतिशात रानाथारु समुदायके पढिया बच्चा मिले । ऐसि बीस स्कुलमे रानाथारु और गैर रानाथारु पढिया अधि–अघा मिले ।

मए स्कुलके हेडमास्टरसे कक्षा एक कि कोनो भितर जान आज्ञा लओ । जब मए बो कक्षाके भितर जान तयार रहओं मए रानाथारु भाषाको अवाज सुनो  मोके लागो बो कक्षामे आज मेडम और सर कोइ नैयाँ, बच्चा किताब पढन छोडके हल्ला कर रहे हएँ । मए जैसी कक्षा भितर घुसन करो तबहि एक अवाज आओ ”पढ डारे ?“ मए पच्छु ओहोरो और देखो एडमके । मए नमस्कार करतए मेडमके अप्नो परिचए दओ । ”राम राम सर“ ।

मए राम राम लौ पर उतनो खुलके नाए । बे मेडम अपन परिचए दैं । मेडम राना जात कि रहएँ । मए कुछ देरल सोचो तभै बो कोठाम राना भासाक अवाज आत रहए । मए फिर  बे मेडम से अनुमती लओ भितर जानके । मेडम हँसतए मोके

कोठा भितर जान अनुमती दैँ । जैसी मए फाटकसे भित्र घुसो सबए बच्चा उठे औ पहिले राम राम औ दुबारा Good morning कहि, मए कहो ”राम राम !“ मिर बारेमे मेडम बतकाइँ औ सुरु करि तौ सबए पढिया बच्चा अपनि किताब बन्द करके  झोराके उपर धरलैं। मिर नजर बो किताब मे पडि । किताबक खोलमे लिखोरहए“ रानाथारु भासा क किताब कक्षा १ कि अभ्यास पुस्तिका । मए एक बच्चक किताब उठाओ, किताबक अग्गु औ पच्छु देखो दोनो घेन रानाथारु भासा मे लिखो रहए । मए बिचक पन्ना लौटो देखो एक कथा । कथा रहए ”दुलारी “ ।

मए सोचो ओहो ज किताब कब्से पढान लगे । उत्तर मिलो ”जहे साल से“ मेडम मोके और जान कारी दैं ”जा रानाथारु भासाकी किताब कैलाली और कंचनपुर के सत्ताइस स्कुलमे पढाइ होत हए ।“ मिर मन खुसी भौ । मए और जाके बारेमे जानकारी लेन लगो । मेडम जानकारी देनमे कोइ कमि नाए करिं । मए और जानन इच्छा करन लगो बे जा किताबक लेखक के बारेमे जानकारी दैं । मिर मन हरो हुइगओ । काहेन हुइहए अप्नो त अपनु होत हए ।

मए मेडम से अनुमती लओ और अपन जानकारी पढियन से लेन देन करन लगो । मए पांच वर्ष कि एक लौडिया के अपन घेन बुलाओ । बो तुरुन्तय मिर ठिन आइ । बाके मए पुछन लगो  ”तिर नावँ का हए ?“

”जमुना ।“  कित्तो अच्छो नावँ  । फिर मए पुछो बाको जबाफ फटाफट आए पचकडिया,  ५ वर्ष , मनोहर, मंजु, हेडसर राम , कक्षा शिक्षक ”सरिता“ ”स्याबास “ मिर जबाफ । मेडम मुस्करात, ”और कुछ हए सर?“ मए मुड हलातए कहो, ”बस थोरी औ ।“ मए मनय मनमे सोचो कि जा बच्चक दिमाक  कम्पुटर हए जो पुछओ फटाफट  ।

मए बहे बच्चाके एक पाठ पढन कहो बो पाठ बहुत अच्छे से पढि । कहुं थोरी लवज बिगड्त रहए फिर समार लेत रहए काहेकी बो किताब त रानाथारु भाषामे लिखि रहए । फिर के मए कक्षा १ कि दुसरी सेक्सन मे गओ । हुंवा सरसे परिचय देतए अनुमती मागो औ एक बच्चाके अपन ठिन बुलाओ । ”तिम्रो

नाम के हो बाबु ? मए पुछो । बच्चा अपन शरीर हलान लागो, हात मुड मे धरी, घेंट टेढो करि । मए फिर कहो“ भन भन्, यो चकलेट दिन्छु। धिरेसे ”केछब, गाउँ पचकलिया“ । सर जा बच्चा अच्छे से नाए मसक पात हए का ? ”सर कहि काहेन, खुब मस्कत हए जाके रानामे पुछओ । जब मए राना भाषामे पुछो तओ बो बच्चा फटाफट  जबाफ देन लगो, ”केसब, पचकडिया, एक कक्षा, हरि ।“ स्कुलसे मए अपन घर घेन कि यात्रा सुरु कर्दओ । डगरमे मए सोचन लगो किताब के बारेमे, बे बच्चा के बारेमे, उनकी पढाइक बारेम ।

उजियाराे रानाथारू भाषा कि किताब से

ध.उ.म.न.पा.–११,